Sweden Russia Drone News : स्वीडनच्या हवाई हद्दीत घुसलेले रशियाचे ड्रोन स्वीडनच्या लष्कराने पाडले आहे. फ्रान्सची विमानवाहू नौका माल्मो बंदरावर नांगर टाकून उभी असताना हे ड्रोन देशाच्या दक्षिणेकडील सीमेमध्ये घुसले होते. स्विडनच्या नौदलाच्या जहाजाने गस्तीच्यावेळी या संशयित ड्रोनच्या हालचाली टिपल्या. स्वीडन आणि डेन्मार्कला वेगळे करणाऱ्या ओरसंड सामुद्रधुनीमध्ये हे ड्रोन बघितले गेले होते. त्यानंतर या ड्रोनला पाडण्यात आले, असे स्वीडनच्या सशस्त्र दलांनी सांगितले. फ्रान्सची चार्ल्स डी गॉली ही अण्वस्त्रवाहक विमानवाहू नौका नाटोच्या नियमित सरावाचा भाग म्हणून या आठवड्यात स्वीडनच्या दक्षिणेकडील माल्मो शहराजवळ उभी आहे. माल्मो शहर ओरसंड सामुद्रधुनीमध्ये डेन्मार्कची राजधानी कोपनहेगनच्या समोरच्या बाजूला आहे. हे ड्रो बुधवारी दिसले होते आणि चार्ल्स डी गॉलीपासून १० किलोमीटर अंतरावर असताना ते पाडले गेले, असे फ्रेंच लष्कराच्या प्रवक्त्याने सांगितले. स्वीडनच्या सागरी हद्दीचे उल्लंघन करणारे हे ड्रोन स्वीडनच्या सागरी हद्दीतल्या जहाजावरून डागले गेले असावे. बहुतेक रशियाच्या जहाजावरून हे डागले गेले असावे, असा संशय आहे. रशियाचे जहाज बाल्टिक समुद्रात सक्रिय असून या संदर्भात स्वीडनने डेन्मार्कशी संपर्क साधला असल्याचेही या प्रवक्त्याने सांगितले
