कन्नूर : ज्येष्ठ मल्याळी अभिनेते सुरेश गोपी यांनी रविवारी केंद्रीय मंत्रिपद सोडण्याची इच्छा व्यक्त केली. त्यांनी स्वत:च्या जागी भाजपचे राज्यसभा खासदार सी.सदानंदन मास्टर यांच्या नावाचीही शिफारस केली. मागील वर्षीच्या लोकसभा निवडणुकीत ६७ वर्षीय गोपी यांनी विजय मिळवला.

केरळमधून लोकसभेवर निवडून जाणारे ते भाजपचे पहिले उमेदवार ठरले. त्यांची केंद्रीय मंत्रिमंडळात वर्णी लागली. ते पेट्रोलियम आणि पर्यटन राज्यमंत्री म्हणून कार्यरत आहेत. त्यांनी केरळमधील भाजपच्या एका कार्यक्रमात बोलताना सगळ्यांनाच चकित करणारे वक्तव्य केले. माझ्या जागी सदानंदन मास्टर यांना केंद्रीय मंत्री बनवले जावे. ती घडामोड केरळच्या राजकीय इतिहासात नवा अध्याय ठरेल.

मी ऑक्टोबर २०१६ मध्ये भाजपमध्ये प्रवेश केला. इतरांच्या तुलनेत तसा मी भाजपचा नवा सदस्य आहे. पक्षाने बहुधा लोकसभा निवडणुकीतील जनादेशाचा विचार करून मला केंद्रीय मंत्री बनवले. खरेतर, चित्रपट कारकीर्द सोडून मंत्री बनण्याची माझी कधीच इच्छा नव्हती. मागील काही काळापासून माझ्या उत्पन्नात मोठी घट झाली आहे, अशी स्पष्टोक्ती गोपी यांनी केली.