प्रभात वृत्तसेवा पुणे – दोन्ही राष्ट्रवादी एकत्र येण्यावरून आतापर्यंत आमच्यात कोणतीही चर्चा झालेली नाही, अशी स्पष्टोक्ती राष्ट्र्वादी काॅंंग्रेस शरद्चंद्र पवार पक्षाच्या कार्याध्यक्ष खासदार सुप्रिया सुळे यांनी बुधवारी पत्रकार परिषदेत दिली. कार्यकर्त्यांशी संवाद साधण्यासाठी, त्यांचे प्रश्न जाणून घेण्यासाठी, त्यांच्याशी मोकळेपणाने बोलण्यासाठी शहर कार्यालयात आलो आहोत, असे सुळे यांनी सांगितले. नाराज प्रशांत जगताप यांच्याबरोबर सहा तास चर्चा झाली, त्यांचे सगळे म्हणणे ऐकून घेतले, प्रत्येक कार्यकर्त्याला न्याय मिळायला हवा यासह त्यांच्या सगळ्या अटी मान्य केल्या आहेत. तरीही ते टोकाची भूमिका का घेत आहेत, हे मला समजत नाही. जगताप यांची मन की बात काय, कुठलीही बात ऐकायची माझी तयारी आहे. ते म्हणतील ते दिशा, ते म्हणतील ते उमेदवार द्यायला तयार आहे, असे त्यांना सांगितल्याचा दावा खासदार सुळे यांनी पत्रकार परिषदेत केला. तुमच्या समक्ष मी त्यांच्याशी चर्चा करायला तयार आहे, कोणत्याही विषयावर डिबेट करायाला तयार आहे, असे खासदार सुळे यांनी स्पष्ट केले. जगताप यांचा राजीनामा आपल्याकडे आलेलाच नाही, मला देऊनही उपयोग नाही. राजीनामा प्रदेशाध्यक्षांकडे द्यावा लागणार, असे त्या म्हणाल्या. मात्र, ते आता येथे कार्यालयात का नाहीत, याचे ठोस उत्तर न देता माजी खासदार वंदना चव्हाणही नाहीत, असे उत्तर देत खासदार सुळे यांनी प्रश्नाला बगल दिली.एकाबाजूला जगताप यांच्याशी चर्चा केली, त्यांचे म्हणणे मान्य केले. असे सांगतानाच पक्षाचे अध्यक्ष शरद पवार हे आमचे केंद्रबिंदू असून, ते जे ठरवतील ते आम्हांला मान्य आहे.आम्ही केवळ पक्षाचे सेवक आहोत, असे खा. सुळे म्हणाल्या. मी फक्त निवडणुकीपुरते बोलणार, माझा प्रयत्न हा पक्ष वाढवणे आहे, असे खा. सुळे यांनी नमूद केले.
