पुणे : शिवसेनेचे निवडणूक चिन्ह आणि पक्षाचे नाव गोठवण्याचे आदेश निवडणूक आयोगाकडून देण्यात आल्यानंतर आता राज्याच्या राजकारणात एकच खळबळ उडाली आहे. या पार्श्वभूमीवर राजकीय वर्तुळातून प्रतिक्रिया येत असताना राष्ट्रवादी काँग्रेसच्या खासदार सुप्रिया सुळे यांनी यावरून भाजपाला खोचक टोला लगावला आहे. हिंदी चित्रपटातील एका गाण्याचा उल्लेख करत भाजपा आणि एकनाथ शिंदे यांना हे गाणं लागू होते, असे त्यांनी म्हटले. त्या पुण्यात बोलत होत्या. आयोगाने दिलेल्या निर्णयावर बोलताना,” अशा प्रकारे पक्ष आणि विचार संपत नाहीत, असे सुप्रिया सुळे प्रसारमाध्यमांना म्हणाल्या. “राष्ट्रवादी काँग्रेस पक्ष संपेल असं २०१९मझध्ये सगळेच म्हणत होते. अनेक लोक म्हणत होते की ‘जड से उखाड दूंगा’. असे येतात लोक, वक्तव्य करतात. पण विचार आणि कार्यकर्ते असे संपत नाहीत. तसं झालं असतं, तर देशातले सगळेच पक्ष आत्तापर्यंत संपले असते. त्यांचा जर हा अहंकार असेल, तर मग हे कधीच संपणार नाही”, असेही सुप्रिया सुळे यावेळी म्हणाल्या. दरम्यान, यावेळी बोलताना सुप्रिया सुळेंनी भाजपा आणि शिंदे गटाला खोचक शब्दांत टोला लगावला आहे. “या सगळ्या प्रकरणात दोन मुद्दे आहेत. एक तर शिवसेनेवर हा अन्याय आहेच. पण मला एक जुनं गाणं आठवतं. ‘हम बेवफा, हरगिज न थे.. पर हम वफा कर ना सके. भाजपानं एकनाथ शिंदेंवर असाच वार केला आहे. चिन्ह आणि नाव कुणालाच मिळालं नाही”, असेदेखील यावेळी त्यांनी सांगितलं. “अशीच एक घटना आंध्र प्रदेशमध्ये ९५ साली घडली होती. चंद्राबाबू आणि एनटीआर यांच्यात मतभेद झाले होते. तेव्हा अशीच लढाई झाली होती. तेव्हा केंद्रात पी. व्ही. नरसिंहराव यांचं सरकार होतं. सहा महिन्यांच्या आतच त्यांनी चिन्ह चंद्राबाबू यांना दिलं होतं. सध्या राज्यातलं हे पूर्ण कारस्थान उद्धव ठाकरेंच्या विरोधात आहेच. पण मला काळजी शिंदे गटाची वाटतेय. हे गाणं जर त्यांनी ऐकलं असेल, तर भाजपाकडून ‘आम्ही बेवफा नाही, पण तुमच्याशी वफाही करू शकलो नाही’ असेच झालंय. हे गाणं आज भाजपा आणि शिंदे गटाला योग्यपणे लागू होतं”, अशा शब्दांत सुप्रिया सुळेंनी भाजपा आणि शिंदे गटाला चिमटा काढला.
