नवी दिल्ली – युट्यूबर रणवीर अलाहाबादियाने मंगळवारी सर्वोच्च न्यायालयात याचिका दाखल केली आणि त्याच्या शोमध्ये शालीनता राखण्याची हमी दिली. रणवीर त्याचा पासपोर्ट जारी करण्याची मागणी करतो आहे. त्याने सांगितले की अनेक मुलाखतींच्या संदर्भात त्याला परदेशात जावे लागते आणि अनेक बैठकांना उपस्थित राहावे लागते. रणवीरने असा युक्तिवाद केला की याचा त्याच्या उपजीविकेवर परिणाम होत आहे. तथापि, न्यायालयाने त्याची याचिका फेटाळून लावत म्हटले की जर तो परदेशात गेला तर त्याचा तपासावर परिणाम होईल.

रणवीर अलाहाबादिया व्यतिरिक्त, आशिष चंचलानी यानेही त्याचा पासपोर्ट परत मिळावा यासाठी न्यायालयाकडे अपील केले होते, परंतु सर्वोच्च न्यायालयाने त्याचीही याचिका फेटाळून लावली.

खंडपीठाने महाराष्ट्र आणि आसाम सरकारचे प्रतिनिधित्व करणारे सॉलिसिटर जनरल तुषार मेहता यांना तपास पूर्ण करण्यासाठी किती वेळ लागेल याबद्दल विचारले. तुषार मेहता यांनी दोन आठवड्यात तपास पूर्ण होण्याची शक्यता व्यक्त केली. खंडपीठाने सांगितले की, दोन आठवड्यांनंतर पासपोर्ट जारी करण्याच्या अलाहाबादियाच्या विनंतीवर विचार केला जाईल.

इंडियाज गॉट लेटेंटवरील अश्लील आणि वादग्रस्त वक्तव्यांमुळे वादात सापडलेल्या रणवीरला सर्वोच्च न्यायालयाने ३ मार्च रोजी त्याचा पॉडकास्ट द रणवीर शो पुन्हा सुरू करण्याची परवानगी दिली. ही परवानगी या अटीवर देण्यात आली की त्यात नैतिकता आणि सभ्यता राखली जाईल आणि ती सर्व वयोगटातील प्रेक्षकांसाठी योग्य असेल.

रणवीर अलाहाबादियाने कॉमेडियन समय रैनाच्या या यूट्यूब शोमध्ये पालकांबद्दल अश्लील कमेंट केल्या होत्या. त्यानंतर त्याच्यावर गुन्हा दाखल करण्यात आला. १८ फेब्रुवारी रोजी, सर्वोच्च न्यायालयाने अल्लाहबादिया याला अटकेपासून अंतरिम संरक्षण दिले, तर त्याच्या टिप्पण्यांबद्दल त्याला फटकारले होते.