Sunny Sanskari Ki Tulsi Kumari Teaser: बॉलीवूडचा एनर्जेटिक स्टार म्हणून ओळखला जाणारा वरुण धवन पुन्हा एकदा प्रेक्षकांचे मनोरंजन करण्यासाठी सज्ज झाला आहे. त्याच्या आगामी चित्रपटाचा ‘सनी संस्कारी की तुलसी कुमारी’ टीझर प्रदर्शित झाला असून, यात रोमँस, कॉमेडी आणि ड्रामाचा तडका दिसून येतो. या चित्रपटात वरुणसोबत जान्हवी कपूर, सान्या मल्होत्रा आणि रोहित सराफ यांची उपस्थिती पाहायला मिळत आहेत. टीझरच्या सुरुवातीलाच वरुण बाहुबलीच्या कॉस्ट्यूममध्ये दिसतो आणि लगेच सांगतो की तो बाहुबली नसून “सनी संस्कारी” आहे. या एका डायलॉगमुळेच चित्रपटाचा मूड हलकाफुलका आणि मनोरंजक असल्याचे स्पष्ट होते. प्रेक्षकांना वरुणची ही एनर्जेटिक आणि हसवणारी अदा खूप भावली आहे. फिल्ममेकर करण जौहर यांनी हा टीझर इन्स्टाग्रामवर शेअर करताना एक मजेशीर ओळ लिहिली, “चार लोक, दोन हार्टब्रेक्स आणि एक लग्न”. या एका वाक्यातूनच चित्रपटाच्या कथानकाचा गाभा समजतो. म्हणजेच नात्यांमध्ये गुंतलेली प्रेमकथा, हृदयभंग आणि अखेरीस लग्नाचा ट्विस्ट हे सगळं प्रेक्षकांना रंगतदार पद्धतीने पाहायला मिळणार आहे. चित्रपटाचं दिग्दर्शन शशांक खेतान यांनी केलं आहे. त्यांनी याआधी हम्प्टी शर्मा की दुल्हनिया, बद्रीनाथ की दुल्हनिया आणि धडक सारख्या लोकप्रिय चित्रपटांचं दिग्दर्शन केलं आहे. त्यांच्या फिल्म्समध्ये रोमँस आणि ड्रामाचं योग्य मिश्रण असतं, आणि यावेळीही प्रेक्षकांना त्याच प्रकारचा अनुभव मिळेल अशी अपेक्षा आहे. निर्मितीचं काम करण जौहर यांच्या धर्मा प्रॉडक्शन्सकडे आहे, जी नेहमीच भव्यता, उत्तम प्रॉडक्शन क्वालिटी आणि रंगतदार कथांसाठी ओळखली जाते. ही फिल्म २ ऑक्टोबर २०२५ रोजी प्रदर्शित होणार आहे. मात्र त्याच दिवशी कन्नड चित्रपटसृष्टीची बहुचर्चित फिल्म ‘कांतारा: चैप्टर 1’ रिलीज होत असल्याने, बॉक्स ऑफिसवर हिंदी आणि दक्षिण भारतीय चित्रपटांमध्ये थेट सामना होणार आहे. त्यामुळे प्रेक्षकांना त्या दिवशी दोन मोठ्या सिनेमांचा दुहेरी आनंद घेता येणार आहे. ‘सनी संस्कारी की तुलसी कुमारी’ हा चित्रपट प्रेक्षकांना हसवणारा, भावनिक आणि रोमँटिक प्रवास घडवेल, अशी खात्री टीझरवरूनच वाटते.
