Sunflower oil : खाद्यतेलाच्या वाढत्या किमतींपासून ग्राहकांना दिलासा मिळण्याची शक्यता आहे. केंद्र सरकारने कच्च्या सूर्यफूल तेलावरील मूलभूत आयात शुल्क 10 टक्क्यांवरून थेट शून्य केले आहे. तसेच रिफाइंड सूर्यफूल तेलावरील शुल्क 32.5 टक्क्यांवरून 22.5 टक्के करण्यात आले आहे. या निर्णयामुळे आगामी काळात सूर्यफूल तेलाची आयात वाढून त्याच्या किमती नरमण्याची शक्यता आहे.

सॉल्वेंट एक्स्ट्रॅक्टर्स असोसिएशन ऑफ इंडिया (SEA)च्या अंदाजानुसार, 2026-27 या मार्केटिंग वर्षात सूर्यफूल तेलाची आयात सुमारे 25 ते 30 टक्क्यांनी वाढून 35 लाख टनांपर्यंत पोहोचू शकते. आयात शुल्क कमी झाल्याने कच्चे सूर्यफूल तेल देशात आणणे स्वस्त होईल. त्यामुळे बाजारात त्याची उपलब्धता वाढण्याची शक्यता आहे.

सोयाबीन तेलाच्या आयातीवर परिणाम –

सूर्यफूल तेल स्वस्त झाल्यास ग्राहकांकडून त्याची मागणी वाढू शकते. त्याचा परिणाम सोयाबीन तेलाच्या आयातीवर होण्याची शक्यता आहे. 2026-27 मध्ये सोयाबीन तेलाची आयात सुमारे 10.7 टक्क्यांनी घटून 50 लाख टनांवर येण्याचा अंदाज आहे. दुसरीकडे, पाम तेलाची आयात सुमारे 80 लाख टनांवर स्थिर राहण्याची शक्यता आहे.

भारत आपल्या खाद्यतेलाच्या गरजेपैकी सुमारे दोन तृतीयांश गरज आयातीद्वारे भागवतो. त्यामुळे जागतिक बाजारातील दर आणि देशांतर्गत उत्पादनाचा थेट परिणाम खाद्यतेलाच्या किमतींवर होतो.

ग्राहकांना दिलासा, पण शेतकऱ्यांसाठी आव्हान –

सूर्यफूल तेलाची उपलब्धता वाढल्यास त्याच्या किमती कमी होऊ शकतात. सोयाबीन तेलाच्या मागणीत घट झाल्यास त्याच्या दरांवरही दबाव येऊ शकतो. मात्र, देशांतर्गत सोयाबीन, मोहरी आणि इतर तेलबियांचे उत्पादन कमी झाल्यास आयातीवरील अवलंबित्व आणखी वाढू शकते.

त्यामुळे सरकारसमोर ग्राहकांना स्वस्त खाद्यतेल मिळवून देतानाच देशातील तेलबिया उत्पादक शेतकरी, तेल गिरण्या आणि रिफायनरी उद्योगांच्या हिताचा समतोल राखण्याचे आव्हान राहणार आहे.