Sunetra Pawar : अजित पवार यांच्या विमान अपघाती निधनानंतर महाराष्ट्राच्या राजकीय क्षितिजावर एक नवे पर्व सुरू होताना दिसत आहे. उपमुख्यमंत्री पदावर निर्माण झालेली पोकळी भरून काढण्यासाठी सुनेत्रा पवार (Sunetra Pawar) यांचे नाव प्रमुखपणे चर्चेत आहे. राष्ट्रवादी काँग्रेस पक्षाचे (एनसीपी) ज्येष्ठ नेते छगन भुजबळ यांनी दिलेल्या संकेतांनुसार,उद्या सुनेत्रा पवार उपमुख्यमंत्री पदाची शपथ घेऊ शकतात. हे प्रत्यक्षात घडल्यास महाराष्ट्राला पहिली महिला उपमुख्यमंत्री मिळेल, ही ऐतिहासिक घटना ठरेल. सुनेत्रा पवार यांची पार्श्वभूमी आणि राजकीय प्रवास सुनेत्रा पवार (Sunetra Pawar) यांचा जन्म १८ ऑक्टोबर १९६३ रोजी झाला. त्या राजकीय घराण्यातील असून, त्यांचे भाऊ पद्मसिंह पाटील हे माजी राज्य मंत्री आणि लोकसभा खासदार राहिले आहेत. राजकारणात सक्रिय होण्यापूर्वी सुनेत्रा यांनी सामाजिक आणि पर्यावरण क्षेत्रात मोठे योगदान दिले आहे. त्यांनी ‘एन्व्हायर्नमेंटल फोरम ऑफ इंडिया’ ही संस्था स्थापन करून सेंद्रिय शेती, ग्रामीण विकास आणि शाश्वत पर्यावरणासाठी कार्य केले. बारामतीतील अनेक संस्थांच्या प्रशासकीय जबाबदाऱ्या त्या यशस्वीपणे सांभाळत आहेत. त्यांचा सक्रिय राजकीय प्रवेश हा तुलनेने अलीकडचा आहे. Sunetra Pawar २०२४ च्या लोकसभा निवडणुकीत त्यांना बारामती मतदारसंघातून उमेदवारी देण्यात आली होती. जरी त्या निवडणुकीत त्यांना यश मिळाले नसले तरी पक्षाने त्यांच्यावर विश्वास ठेवून प्रफुल पटेल यांच्या राजीनाम्यानंतर रिक्त झालेल्या राज्यसभा जागेवर बिनविरोध निवड केली. राज्यसभेत अनुभव घेतल्यानंतर आता थेट राज्य मंत्रिमंडळात मोठी जबाबदारी मिळण्याची शक्यता आहे. पक्ष आणि सरकारमधील पोकळी भरून काढण्याचे प्रयत्न अजित पवार यांच्या २८ जानेवारी २०२६ रोजी बारामती विमान अपघातातील निधनाने एनसीपी आणि महायुती सरकारमध्ये मोठी पोकळी निर्माण झाली. पक्षातील अनेक नेते आणि कार्यकर्ते सुनेत्रा पवार यांना अजितदादांच्या वारसदार म्हणून पाहत आहेत. छगन भुजबळ यांनी स्पष्ट केले की, एनसीपी विधिमंडळ पक्षाची बैठक ३१ जानेवारीला होईल, ज्यात सुनेत्रा पवार यांना विधिमंडळ पक्षनेते म्हणून निवडले जाऊ शकते. मुख्यमंत्री देवेंद्र फडणवीस यांनी याला विरोध नसल्याचे संकेत दिले आहेत. अनेक नेत्यांनी सुनेत्रा यांच्या नावाला पाठिंबा दिला आहे. सुनेत्रा पवार सध्या राज्यसभा सदस्य असल्याने उपमुख्यमंत्री पदासाठी त्यांना विधानसभेची सदस्यता घ्यावी लागेल. यासाठी अजित पवार यांच्या बारामती मतदारसंघात पोटनिवडणूक लढवण्याची शक्यता आहे. पक्षातील काही नेते त्यांच्या मुलांना (जय किंवा परथ) पोटनिवडणुकीत उतरवण्याची चर्चा करत आहेत, पण सुनेत्रा यांच्यावरच मुख्य भर आहे. सुनेत्रा पवार यांच्यासमोरील आव्हाने महाराष्ट्राच्या इतिहासात उपमुख्यमंत्री पदावर आजपर्यंत कोणत्याही महिलेची नियुक्ती झालेली नाही. सुनेत्रा पवार यांनी शपथ घेतल्यास त्या राज्याच्या पहिल्या महिला उपमुख्यमंत्री ठरतील. ही घटना राष्ट्रवादी काँग्रेससाठीच नव्हे, तर महाराष्ट्राच्या राजकीय इतिहासात महिला सशक्तीकरणाचे मोठे पाऊल ठरेल. मात्र, सुनेत्रा पवार यांच्यासमोर मोठी आव्हाने आहेत. अजित पवार यांचे मजबूत नेतृत्व, ग्रामीण-शहरी भागातील प्रभाव आणि पक्षातील संतुलन सांभाळणे हे कठीण असेल. कार्यकर्त्यांच्या भावना आणि कुटुंबाचा वारसा यांच्या जोरावर त्या पक्षाला मजबूत ठेवू शकतात, अशी अपेक्षा आहे.सध्या राजकीय वर्तुळात सुनेत्रा पवार यांच्या नावाची जोरदार चर्चा आहे. शनिवारी होणाऱ्या बैठकीनंतरच याबाबत अधिकृत घोषणा अपेक्षित आहे. हे पण वाचा : मोठी बातमी..! ऐन निवडणुकीत बड्या IAS अधिकाऱ्यांच्या बदल्या; पहा कोणाची कुठे बदली
