Sunetra Pawar : अजित पवार यांच्यानंतर त्यांच्या पत्नी सुनेत्रा पवार (Sunetra Pawar) यांनी उपमुख्यमंत्रिपदाची शपथ घेतली. अजित पवार यांच्याकडे असलेले अर्थ खाते वगळून उत्पादन शुल्क, क्रीडा व युवक कल्याण आणि औकाफ ही तीन खात्यांची जबाबदारी सोपविण्यात आली. अर्थखात्याची जबाबदारी मुख्यमंत्री देवेंद्र फडणवीस यांनी ठेवली. आता याबाबत महत्त्वाची माहिती समोर आली आहे. येत्या 23 फेब्रुवारीपासून राज्याच्या अर्थसंकल्पीय अधिवेशनाला सुरुवात होत आहे. अर्थसंकल्प 6 मार्चला मांडला जाणार आहे. मुख्यमंत्री देवेंद्र फडणवीस राज्याचा अर्थसंकल्प मांडतील. त्यानंतर चार ते पाच महिन्यांत पुन्हा अर्थखाते हे राष्ट्रवादी काँग्रेसला दिले जाणार आहे, अशी माहिती सूत्रांकडून मिळत आहे. अलीकडेच, उपमुख्यमंत्री सुनेत्रा पवार, पार्थ पवार आणि जय पवार यांची मुख्यमंत्री देवेंद्र फडणवीस यांच्यासोबत बैठक पार पडली. sunetra pawar याच बैठकीत अर्थखाते पुन्हा राष्ट्रवादी काँग्रेसकडे देण्याचा निर्णय झाला असल्याची माहिती आहे. त्यामुळे अर्थ व नियोजन हे महत्त्वाचे खाते पुन्हा एकदा राष्ट्रवादी काँग्रेस पक्षाला देण्यासाठी हालचाली सुरू झाल्या आहेत. अर्थ आणि नियोजन हे महत्त्वाचे खाते पुन्हा राष्ट्रवादीला सोपवून अजित पवारांचा वारसा पुढे नेण्याचा विचार महायुती सरकारमध्ये सुरू असल्याचे बोलले जात आहे. अजित पवार यांनी तब्बल ११ वेळा राज्याचा अर्थसंकल्प मांडला आहे. मात्र, त्यांच्या आकस्मिक निधनानंतर हे महत्त्वाचे खाते मुख्यमंत्र्यांनी स्वत:कडे ठेवले असून, अधिवेशन झाल्यानंतर ते पुन्हा राष्ट्रवादी काँग्रेस पक्षाकडे जाणार असल्याचे सांगितले जात आहे.
