Suicide Case – सणसवाडी (ता. शिरूर) येथे एका ३२ वर्षीय विवाहितेने पतीच्या सततच्या त्रासाला कंटाळून गळफास घेऊन आत्महत्या केल्याची धक्कादायक घटना घडली आहे. या घटनेनंतर संतप्त झालेल्या माहेरच्या नातेवाईकांनी आरोपीला तात्काळ अटक करण्याच्या मागणीसाठी महिलेचा मृतदेह रुग्णवाहिकेतून थेट शिक्रापूर पोलीस स्टेशनच्या दारात आणून उभा केला. याप्रकरणी पोलिसांनी पती मयूर रमेश तिखे याच्याविरुद्ध आत्महत्येस प्रवृत्त केल्याचा गुन्हा दाखल करून त्याला अटक केली आहे. मिळालेली माहिती अशी की, ज्योती मयूर तिखे (वय ३२) हिला तिचा पती मयूर हा दारू पिऊन वारंवार त्रास देत होता. या वादावर यापूर्वी कौटुंबिक बैठकाही झाल्या होत्या. मात्र, १७ फेब्रुवारी रोजी त्रासाला कंटाळून ज्योतीने राहत्या घरात गळफास घेतला. ही माहिती मिळताच ज्योतीच्या माहेरच्या नातेवाईकांनी सणसवाडी येथे धाव घेतली आणि पतीच्या छळामुळेच तिने हे पाऊल उचलल्याचा आरोप केला. आरोपीला अटक केल्याशिवाय मृतदेह ताब्यात घेणार नाही, असा आक्रमक पवित्रा नातेवाईकांनी घेतल्याने पोलीस स्टेशन परिसरात तणाव निर्माण झाला होता. पोलिसांनी मध्यस्थी करत नातेवाईकांची समजूत काढली आणि मृतदेह शवविच्छेदनासाठी पाठवला. याप्रकरणी ज्योतीचे वडील सोमनाथ खंडूजी गजरे (रा. पेरणे फाटा) यांनी फिर्याद दिली आहे. त्यानुसार पोलिसांनी मयूर तिखे याला बेड्या ठोकल्या असून, पुढील तपास पोलीस उपनिरीक्षक सोमनाथ कचरे करत आहेत.
