Sugar Price : सरकारी उपाययोजनांनंतर कारखान्यातील साखरेच्या दरात मोठी घसरण झाली आहे. सोमवारी कारखान्यातील साखरेचा दर जवळपास 30 टक्क्यांनी कमी होऊन 47 रुपये प्रति किलो झाला. 18 ऑगस्ट रोजी हाच दर 67 रुपये प्रति किलो या उच्चांकावर पोहोचला होता. मात्र, कारखान्यातील दर घसरूनही त्याचा फायदा अद्याप किरकोळ ग्राहकांना मिळालेला नाही.

उद्योग क्षेत्रातील सूत्रांनुसार, कारखान्यातील दर कमी झाल्यानंतर त्याचा परिणाम घाऊक बाजारात लगेच दिसतो. मात्र, किरकोळ बाजारात दर कमी होण्यासाठी काही दिवस लागतात. जास्त दराने आधीच साखर खरेदी केलेले किरकोळ विक्रेते तोटा सहन करून विक्री करण्यास तयार नसल्याने जुन्या साठ्याची विक्री जुन्याच दराने केली जात आहे.

एका किरकोळ विक्रेत्याकडे साधारण 50 किलोच्या 10 ते 15 गोण्या साखरेचा साठा असतो. हा साठा संपल्यानंतर कमी दरात नवीन माल मिळाल्यास किरकोळ दरातही घट होण्याची शक्यता आहे. उद्योग सूत्रांच्या मते, त्यासाठी किमान 10 दिवस लागू शकतात.

रविवारी किरकोळ बाजारात साखरेचा दर 64.23 रुपये प्रति किलो, तर घाऊक दर 59.72 रुपये प्रति किलो होता. सामान्यतः कारखाना आणि घाऊक दरात 2 ते 3 रुपये, तर कारखाना आणि किरकोळ दरात 7 ते 8 रुपये प्रति किलो फरक असतो.

कारखान्यातील दर का घसरले?

निर्यातीसाठी तयार केलेली शुद्ध साखर देशांतर्गत बाजारात विकण्याची परवानगी सरकारने कारखान्यांना दिली आहे. त्यामुळे पुढील दोन महिन्यांत सुमारे 3 ते 3.5 लाख टन शुद्ध साखर देशांतर्गत बाजारात येण्याची अपेक्षा आहे.

याशिवाय, 15 दिवसांपेक्षा जास्त साखरेचा साठा करणाऱ्या मोठ्या ग्राहकांनी नवीन सरकारी नियमांमुळे साठा कमी करण्यास सुरुवात केली आहे. 1 सप्टेंबरपासून दरमहा 10 टनांपेक्षा जास्त साखर वापरणाऱ्या मोठ्या ग्राहकांना सलग 15 दिवसांपेक्षा जास्त साठा ठेवता येणार नाही. त्यामुळे बाजारातील उपलब्धता वाढून कारखाना दरावर दबाव निर्माण झाला आहे.