Sudershan Reddy। उपराष्ट्रपतीपदाच्या निवडणुकीसाठी इंडिया आघाडीकडून बी सुदर्शन रेड्डी हे उमेदवार असतील. न्यायमूर्ती बी सुदर्शन रेड्डी हे सर्वोच्च न्यायालयाचे माजी न्यायाधीश राहिले आहेत. काँग्रेस अध्यक्ष मल्लिकार्जुन खरगे यांनी आज बी सुदर्शन रेड्डी यांचे नाव जाहीर केले. काँग्रेस अध्यक्ष मल्लिकार्जुन खरगे यांनी, “उपराष्ट्रपतीपदासाठी बी सुदर्शन रेड्डी यांच्या नावावर सर्व विरोधी पक्ष एकमत आहेत” असेही त्यांनी यावेळी म्हटले.

दरम्यान, बी. सुदर्शन रेड्डी यांचा जन्म ८ जुलै १९४६ रोजी झाला. त्यांनी बीए आणि एलएलबीचे शिक्षण घेतले आहे. बी. सुदर्शन रेड्डी यांची न्यायशास्त्रात समृद्ध कारकीर्द आहे. २७ डिसेंबर १९७१ रोजी त्यांनी हैदराबादमधील आंध्र प्रदेश बार कौन्सिलमध्ये वकील म्हणून नोंदणी केली. त्यांनी आंध्र प्रदेश उच्च न्यायालयात रिट आणि दिवाणी खटल्यांमध्ये प्रॅक्टिस केली आहे.

बी. सुदर्शन रेड्डी यांनी १९८८-९० दरम्यान उच्च न्यायालयात सरकारी वकील म्हणून काम केले. १९९० मध्ये त्यांनी ६ महिने केंद्र सरकारसाठी अतिरिक्त स्थायी वकील म्हणूनही काम केले. त्यांनी उस्मानिया विद्यापीठासाठी कायदेशीर सल्लागार आणि स्थायी वकील म्हणून काम केले. २ मे १९९५ रोजी त्यांना आंध्र प्रदेश उच्च न्यायालयाचे कायमस्वरूपी न्यायाधीश म्हणून नियुक्त करण्यात आले. ५.१२.२००५ रोजी त्यांची गुवाहाटी उच्च न्यायालयाचे मुख्य न्यायाधीश म्हणून नियुक्ती करण्यात आली.

तेलंगणाच्या सामाजिक अभियांत्रिकीमध्ये भूमिका Sudershan Reddy। 

बी. सुदर्शन रेड्डी यांनी तेलंगणाच्या सामाजिक अभियांत्रिकीमध्ये मोठी भूमिका बजावली आहे. २०२३ च्या विधानसभा निवडणुकीत दिलेल्या आश्वासनानुसार तेलंगणा सरकारने सामाजिक-आर्थिक, शैक्षणिक, रोजगार, राजकीय आणि जाती सर्वेक्षण (SEEEPC) सुरू केले होते. या सर्वेक्षणातील डेटाचे विश्लेषण करण्यासाठी आणि त्याची अचूकता सुनिश्चित करण्यासाठी एक तज्ञ पॅनेल तयार करण्यात आला होता, ज्याचे नेतृत्व बी. सुदर्शन रेड्डी यांनी केले होते. या पॅनेलचा मुख्य उद्देश सर्वेक्षणात गोळा केलेल्या डेटामध्ये कोणतीही तफावत नाही याची खात्री करणे हा होता. याशिवाय, पॅनेलवर डेटा विश्वसनीय, पारदर्शक आणि धोरण ठरवण्यासाठी उपयुक्त आहे याची खात्री करण्याची जबाबदारी देखील होती.

इंडिया ब्लॉकने बी सुदर्शन रेड्डी यांची निवड का केली ? Sudershan Reddy। 

इंडिया आघाडी उपराष्ट्रपतीपदाच्या निवडणुकीसाठी अशा चेहऱ्यावर पैज लावू इच्छित होता ज्याची विश्वासार्हता आणि प्रतिष्ठा प्रश्नाच्या पलीकडे होती आणि त्याच वेळी ते एक गैर-राजकीय व्यक्ती होते. रेड्डी हे सर्व निकष पूर्ण करत होते.

उपराष्ट्रपतीपदासाठी सीपी राधाकृष्णन यांचे नाव जाहीर करून, एनडीएने द्रविड पक्षांसाठी पेच निर्माण करण्याचा प्रयत्न केला होता. कारण दक्षिणेकडील पक्ष असल्याने, दक्षिणेकडील उमेदवाराला विरोध करणे त्यांच्यासाठी राजकीयदृष्ट्या फायदेशीर ठरले नसते. परंतु बी सुदर्शन रेड्डी यांचे नाव पुढे आणून, इंडिया आघाडीने एनडीएची ही युक्ती हाणून पाडली आहे. आता, बी सुदर्शन रेड्डी यांचे नाव समोर आल्यानंतर, टीडीपी, वायआरसीपी आणि बीआरएस यांना त्यांच्या समर्थन धोरणावर पुनर्विचार करावा लागण्याची शक्यता वर्तवण्यात येत आहे.

इंडिया आघाडीने याविषयी माहिती देताना,एनडीएने संघाकडून आपला उमेदवार आणला आहे तर आम्ही तो सर्वोच्च न्यायालयातून आणला आहे. बी सुदर्शन रेड्डी यांचे नाव विरोधी पक्षातील सर्व पक्षांची मागणी पूर्ण करते. द्रमुकला उपराष्ट्रपती पदासाठी दक्षिण भारतातील एखाद्याचे नाव हवे होते. दुसरीकडे, तृणमूल काँग्रेसला एका गैर-राजकीय व्यक्तीचे नाव हवे होते. सुदर्शन रेड्डी यांच्या नावाने त्यांची इच्छा पूर्ण झाली आहे. आम आदमी पक्षानेही बी सुदर्शन रेड्डी यांना पाठिंबा जाहीर केला आहे. त्यामुळे आता दोन्ही पैकी एक कोणताही उमेदवार जिंकला तर त्याचा आनंद दक्षिणेत होणार आहे आणि कोणत्याही एका उमेदवाराचा पराभव झाला तर दक्षिणेतच त्याचा परिणाम जाणवणार हे नक्की.