नवी दिल्ली : भाजपचे माजी खासदार सुब्रह्मण्यम स्वामी नेहमीच त्यांच्या विधानांमुळे नेहमीच चर्चेत असतात. त्यातच त्यांनी आता आणखी एक विधान करून वाद ओढवून घेतला आहे. स्वामींनी पंढरपूरमध्ये माध्यमांशी बोलताना पंतप्रधान नरेंद्र मोदींची तुलना रावणाशी केली आहे. स्वामींच्या एका ट्विटसंदर्भात प्रश्न विचारण्यात आला असता मोदींचा एकेरी उल्लेख करत मोदी फार अहंकारी असल्याचे म्हटले आहे. त्यांच्या या विधानाने आणखी एक वाद निर्माण होण्याची शक्यता वर्तवण्यात आली आहे.

डॉ. सुब्रह्मण्यम स्वामी श्री विठ्ठल रुक्मिणी मंदिर सरकार मुक्त करण्याबाबत चर्चा करण्यासाठी पंढरपूरमध्ये दाखल झाले होते. या चर्चेनंतर त्यांनी माध्यमांशी संवाद साधला. यावेळी त्यांनी ‘मंदिरं सरकार ताब्यात घेणं चुकीचं आहे’ असे म्हटले. आपला तीर्थक्षेत्र पंढरपूरमधील कॉरिडॉरला विरोध असल्याचे सांगताना त्यांनी येथील सर्व परिस्थिती आपण पाहिल्याचं म्हटलं. तसेच या कॉरिडॉरच्या नादात अनेक गोष्टींचं पाडकाम करावं लागणार असून स्थानिकांना त्याचा विरोध आहे. स्थानिकांचं मत लक्षात घेऊनच पुढे गेलं पाहिजे असे स्वामींनी आपली भूमिका मांडताना म्हटले.

त्यासोबतच त्यांना मंदिरं सरकारमुक्त करण्याबाबत पंतप्रधानांची भेट घेणार का? असे विचारले असता, “पंतप्रधान मोदी हे कोणाचेच ऐकत नसून ते हिंदुत्त्वावादी नाहीत, त्यांनी उत्तराखंडमधील सर्व मंदिरं आपल्या ताब्यात घेतली आहेत, ज्यांना असं वाटतं की पंतप्रधान मोदी चांगले काम करत आहेत, ते सर्व मोदींचे चमचे आहेत”, अशी प्रतिक्रिया स्वामी यांनी दिली. मोदींबद्दल केलेल्या एका ट्विटवरुन स्वामींना प्रश्न विचारण्यात आला असता रावणाचा अहंकारामुळे अंत झाला होता असं म्हणत त्यांनी मोदींबद्दलही भाष्य केलं.

तुम्ही मोदींची तुलना रावणाशी केली होती सर असं म्हणत पत्रकाराने स्वामींना त्यांच्या एका ट्विटबद्दल प्रश्न विचारला. त्यावर स्वामींनी “मी रावणाशी तुलना केली नव्हती. मी म्हटलं होतं की ‘लाइक’ रावण (रावणासारखे) याचा अर्थ असा होता की ते अहंकारामध्ये अनेक गोष्टी करत आहेत,” असं उत्तर दिलं. त्याचप्रमाणे पुढे स्वामींनी, “रावण तर मोदींपेक्षाही जास्त शिकलेला माणूस होता. ज्ञानी होता. पण तो अहंकारामुळे संपला. हा (पंतप्रधान नरेंद्र मोदी) पण अहंकारात कोणाचं ऐकत नाही,” असेही म्हटले.