GDP Growth : भारताची अर्थव्यवस्था आर्थिक वर्ष 2025-26 मध्ये 7.7 टक्क्यांनी वाढली असून, मागील आर्थिक वर्ष 2024-25 मधील 7.1 टक्के वाढीच्या तुलनेत ही कामगिरी अधिक चांगली ठरली आहे. ही माहिती केंद्र सरकारने शुक्रवारी जाहीर केलेल्या अधिकृत आकडेवारीतून समोर आली आहे.

सांख्यिकी आणि कार्यक्रम अंमलबजावणी मंत्रालयाने प्रसिद्ध केलेल्या आकडेवारीनुसार, 2025-26 या आर्थिक वर्षाच्या जानेवारी-मार्च तिमाहीत (चौथी तिमाही) सकल देशांतर्गत उत्पादन (GDP) वाढीचा दर 7.8 टक्के राहण्याचा अंदाज व्यक्त करण्यात आला आहे.

स्थिर किमतींवरील जीडीपीचा आकार 2025-26 मध्ये 323.12 लाख कोटी रुपयांवर पोहोचला असून, तो 2024-25 मधील 299.89 लाख कोटी रुपयांच्या तुलनेत लक्षणीय वाढ दर्शवितो. तर चालू किमतींवरील जीडीपी 346.36 लाख कोटी रुपये राहण्याचा अंदाज असून, तो मागील वर्षाच्या 318.07 लाख कोटी रुपयांच्या तुलनेत 8.9 टक्के अधिक आहे.

आकडेवारीनुसार, आर्थिक वर्ष 2025-26 मध्ये सकल मूल्यवर्धन (GVA) 7.9 टक्क्यांनी वाढण्याचा अंदाज आहे. नाममात्र जीव्हीएमध्ये (Nominal GVA) 9.1 टक्के वाढ अपेक्षित आहे. चौथ्या तिमाहीत वास्तविक जीव्हीए वाढ 7.9 टक्के, तर नाममात्र जीव्हीए वाढ 9.9 टक्के नोंदविण्यात आली.

अर्थव्यवस्थेच्या वाढीत दुय्यम (Secondary) आणि तृतीय (Tertiary) क्षेत्रांनी महत्त्वाची भूमिका बजावली. स्थिर किमतींवरील आकडेवारीनुसार, दुय्यम क्षेत्रात 8.8 टक्के, तर सेवा क्षेत्रात 9.3 टक्के वाढ झाली. प्राथमिक क्षेत्राने 3.2 टक्के वाढ नोंदवली असून, त्यास कृषी व मत्स्य व्यवसायाचा आधार मिळाला.

उत्पादन (मॅन्युफॅक्चरिंग), व्यापार, दुरुस्ती सेवा, हॉटेल व्यवसाय, वाहतूक, दळणवळण, प्रसारण, साठवणूक तसेच वित्तीय सेवा, स्थावर मालमत्ता आणि व्यावसायिक सेवांमध्ये दुहेरी अंकातील वाढ नोंदविण्यात आल्याचे मंत्रालयाने स्पष्ट केले.

खर्चाच्या दृष्टीने पाहता, खासगी अंतिम उपभोग खर्च (PFCE) आणि स्थिर भांडवली गुंतवणूक (GFCF) या दोन्ही घटकांमध्ये 7.5 टक्क्यांहून अधिक वाढ झाली. चौथ्या तिमाहीत जीएफसीएफमध्ये 10.8 टक्के, तर पीएफसीईमध्ये 7.1 टक्के वाढ झाली. यावरून देशातील गुंतवणूक आणि ग्राहक मागणीमध्ये सातत्याने मजबुती कायम असल्याचे संकेत मिळत आहेत.