लिस्बन, (पोर्तुगाल) : वादळ क्लॉडियामुळे पोर्तुगालमध्ये तीन जणांचा मृत्यू झाला आणि डझनभर लोक जखमी झाले. एकूण २८ लोक जखमी झाले आहेत, तर त्यापैकी दोघे गंभीर जखमी झाल्याने रुग्णालयात आहेत, असे अधिकाऱ्यांनी सांगितले. देशातील संपूर्ण अल्गार्वे आणि बेजा आणि सेतुबल जिल्ह्यांना अंबर अलर्टवर ठेवले आहे, असे पोर्तुगीज हवामान सेवेने म्हटले आहे. क्लॉडिया वादळामुळे वेल्सच्या काही भागात रात्रीतून मोठा पूर आला आहे. आग्नेय वेल्समधील नदीचे काठ फुटल्याने मॉनमाउथ शहराला सर्वाधिक फटका बसला आहे. ब्रिटन आणि आयर्लंडच्या काही भागांमध्ये क्लॉडिया वादळामुळे मुसळधार पाऊस झाला. वेल्समधील डझनभर लोकांना घरांमधून बाहेर काढून वाचवण्यात आले. येत्या काही दिवसांत इंग्लंडच्या काही भागात थंडीचा कडाका वाढण्याची शक्यता असल्याने शनिवारी दुपारी इंग्लंडमध्ये सुमारे ५० पूर इशारे अजूनही कायम ठेवण्यात आले. आयर्लंडमधील पोर्टारलिंग्टनमध्येही पूर आल्याची नोंद झाली आहे आणि काही नद्या पूरपातळीपर्यंत पोहोचल्या नसल्याने अधिक पाऊस आल्यास आणखी नुकसान होण्याची शक्यता आहे. जोरदार वाऱ्यांमुळे हजारो घरे आणि व्यवसायांचा वीजपुरवठा खंडित झाला आणि पडलेल्या झाडांमुळे रस्ते बंद झाले.
