Stock Market : अमेरिका-इराण शांतता करारामुळे जागतिक बाजारपेठांमध्ये निर्माण झालेल्या सकारात्मक वातावरणाचा आणि कच्च्या तेलाच्या किमतींमध्ये झालेल्या घसरणीचा भारतीय शेअर बाजाराला (Stock Market)  मोठा फायदा झाला. परिणामी, मंगळवारी सलग तिसऱ्या सत्रात सेन्सेक्स आणि निफ्टीने दमदार वाढ नोंदवली.

बीएसईचा ३० समभागांचा सेन्सेक्स ५४४.१५ अंकांनी अर्थात ०.७१ टक्क्यांनी वधारून ७६,८०८.४८ अंकांवर बंद झाला. दिवसभराच्या व्यवहारात तो ५८२.४१ अंकांनी उसळी घेत ७६,८४६.७४ या उच्चांकापर्यंत पोहोचला. तर एनएसईचा निफ्टी ५० निर्देशांक १३५.२५ अंकांनी (०.५७ टक्के) वाढून २३,९८९.१५ अंकांवर स्थिरावला. सत्रादरम्यान निफ्टीने २४,००२.६० या पातळीलाही स्पर्श केला.  (Stock Market )

परदेशी संस्थात्मक गुंतवणूकदारांनी (FII) भारतीय बाजारात पुन्हा खरेदीचा ओघ सुरू केल्याने गुंतवणूकदारांचा विश्वास अधिक बळकट झाला. सोमवारी एफआयआयने निव्वळ २००.०५ कोटी रुपयांच्या समभागांची खरेदी केली.  (Stock Market)

कोणते शेअर्स वाढले-घसरले ?  (Stock Market )

 

सेन्सेक्समधील एचसीएल टेक, बजाज फिनसर्व्ह, एनटीपीसी, हिंदुस्तान युनिलिव्हर, टाटा कन्सल्टन्सी सर्व्हिसेस (टीसीएस) आणि बजाज फायनान्स या समभागांनी सर्वाधिक वाढ नोंदवली. तर इंटरग्लोब एव्हिएशन, अल्ट्राटेक सिमेंट, मारुती आणि टाटा स्टील यांच्या समभागांमध्ये घसरण झाली.

ब्रेंट क्रूड प्रति बॅरल ८१.४५ डॉलरवर –  (Stock Market)

आंतरराष्ट्रीय बाजारात ब्रेंट क्रूडच्या किमती सुमारे २ टक्क्यांनी घसरून प्रति बॅरल ८१.४५ डॉलरवर आल्या. अमेरिका आणि इराण यांच्यात होर्मुझ सामुद्रधुनी पुन्हा खुली करण्याबाबत झालेल्या करारामुळे तेल आणि नैसर्गिक वायूच्या पुरवठ्याबाबतचा तणाव कमी झाल्याने जागतिक बाजारातील वातावरण सुधारल्याचे विश्लेषकांचे मत आहे.

तज्ज्ञांचे मत –

जिओजित इन्व्हेस्टमेंट्सचे संशोधन प्रमुख विनोद नायर यांनी सांगितले की, अमेरिका-इराण तणाव कमी होण्याची शक्यता आणि कच्च्या तेलाच्या किमतींतील घसरण यामुळे देशांतर्गत बाजारातील तेजीला चालना मिळाली. आयटी, रिअल्टी, एफएमसीजी तसेच तेल व वायू क्षेत्रातील समभागांमध्ये विशेष खरेदी दिसून आली.

आंतरराष्ट्रीय बाजारांची स्थिती –  (Stock Market)

आशियाई बाजारांमध्ये दक्षिण कोरियाचा कोस्पी आणि जपानचा निक्केई निर्देशांक वाढीसह बंद झाले, तर चीनचा शांघाय एसएसई कंपोझिट आणि हाँगकाँगचा हँगसेंग निर्देशांक घसरला. युरोपीय बाजारांमध्येही तेजीचे वातावरण होते. सोमवारी अमेरिकेतील डाऊ जोन्स, एसअँडपी ५०० आणि नॅस्डॅक या प्रमुख निर्देशांकांनीही मजबूत वाढ नोंदवली.

गुंतवणूकदारांची ₹2.71 लाख कोटींनी वाढली संपत्ती –

बाजारातील तेजीमुळे बीएसईवर सूचीबद्ध कंपन्यांच्या एकूण बाजार भांडवलात एका दिवसात तब्बल ₹2.71 लाख कोटींची भर पडली आहे. 15 जून रोजी ₹4,69,54,923.06 कोटी असलेले बाजार भांडवल 16 जून रोजी वाढून ₹4,72,26,425.09 कोटींवर पोहोचले.

क्षेत्रनिहाय वाढ – घट –

क्षेत्रनिहाय पाहता, निफ्टी मेटल निर्देशांकात दीड टक्क्यांहून अधिक घसरण झाली. ऑटो, फार्मा आणि पीएसयू बँक क्षेत्रातही किरकोळ दबाव राहिला. मात्र रिअल्टी निर्देशांक दोन टक्क्यांहून अधिक वाढला, तर आयटी निर्देशांकात दीड टक्क्यांपेक्षा जास्त आणि एफएमसीजीमध्ये एक टक्क्यांहून अधिक तेजी नोंदवली गेली. खासगी बँकांच्या समभागांनाही चांगला प्रतिसाद मिळाला.

बीएसईवर दिवसभरात 4,407 समभागांमध्ये व्यवहार झाले. त्यापैकी 2,368 समभाग वाढले, 1,886 घसरले, तर 153 समभागांमध्ये कोणताही बदल झाला नाही. 113 समभागांनी वर्षभरातील उच्चांक गाठला, तर 60 समभाग वर्षभरातील नीचांकी पातळीवर पोहोचले. याशिवाय 11 समभाग अपर सर्किटमध्ये, तर 8 समभाग लोअर सर्किटमध्ये बंद झाले.

अमेरिकन डॉलरच्या तुलनेत रुपया ५ पैशांनी वधारला; ९४.५३ वर बंद –

अमेरिका आणि इराणमधील तणाव निवळल्याने आणि कच्च्या तेलाच्या किमती घसरल्यामुळे भारतीय रुपया मंगळवारी सलग तिसऱ्या सत्रात मजबूत झाला. आंतरबँकीय परकीय चलन बाजारात रुपया ५ पैशांनी वधारून ९४.५३ (तात्पुरता) वर बंद झाला. गेल्या तीन सत्रांत रुपया एकूण १३२ पैशांनी मजबूत झाला आहे.

हॉर्मुझ सामुद्रधुनीबाबत राजनैतिक करार झाल्याने जागतिक तेल पुरवठ्यावरील संकट टळले आहे. ब्रेंट क्रूड घसरले, जे ९०% तेल आयात करणाऱ्या भारतासाठी फायदेशीर आहे. या सकारात्मक वातावरणात शेअर बाजारातही तेजी आली; सेन्सेक्स ५४४ अंकांनी तर निफ्टी १३५ अंकांनी वधारला. परदेशी गुंतवणूकदारांचा वाढता ओघ रुपयाला आणखी बळ देत आहे.