Stock Market : आठवड्याच्या पहिल्याच व्यवहारदिनी देशांतर्गत शेअर बाजारात नफा वसुलीचा जोर दिसून आला. माहिती तंत्रज्ञान (आयटी) आणि वाहन (ऑटो) क्षेत्रातील समभागांमध्ये मोठ्या प्रमाणावर विक्री झाल्याने सेन्सेक्स आणि निफ्टीने सुरुवातीची आघाडी गमावत लाल निशाणावर व्यवहार समाप्त केला. मात्र, फार्मा क्षेत्रातील खरेदीमुळे बाजारातील घसरण काही प्रमाणात मर्यादित राहिली.

दिवसभरातील व्यवहारात सेन्सेक्सने 77,252.78 अंकांचा उच्चांक गाठला होता. मात्र, त्यानंतर विक्रीचा दबाव वाढल्याने निर्देशांक 600 हून अधिक अंकांनी घसरला. अखेरीस सेन्सेक्स 372.10 अंकांनी अर्थात 0.48 टक्क्यांनी घसरून 76,728.37 अंकांवर बंद झाला. दुसरीकडे, निफ्टी 109.75 अंकांच्या (0.46 टक्के) घसरणीसह 23,946.25 अंकांवर स्थिरावला.

बाजारातील अस्थिरतेचा निर्देशांक असलेल्या इंडिया व्हिक्समध्ये सुमारे चार टक्क्यांची वाढ झाली. याशिवाय, मिडकॅप आणि स्मॉलकॅप समभागांमध्येही दबाव दिसून आला. निफ्टी मिडकॅप 100 निर्देशांक जवळपास अर्धा टक्का घसरला, तर निफ्टी स्मॉलकॅप 100 मध्ये अर्ध्या टक्क्यांहून अधिक घसरण झाली.

फार्मा क्षेत्राचा आधार –  (Stock Market)

फार्मा क्षेत्राने बाजाराला आधार देण्याचा प्रयत्न केला. निफ्टी फार्मा निर्देशांक एक टक्क्यांहून अधिक वाढीसह बंद झाला. मात्र, निफ्टी ऑटो निर्देशांक दोन टक्क्यांपेक्षा अधिक, निफ्टी आयटी एक टक्क्यांहून अधिक आणि निफ्टी पीएसयू बँक निर्देशांक सुमारे एक टक्का घसरला.

गुंतवणूकदारांचे ₹53 हजार कोटींचे नुकसान – 

मुंबई शेअर बाजारात (बीएसई) सूचीबद्ध कंपन्यांचे एकूण बाजार भांडवल एका दिवसात सुमारे 53,815 कोटी रुपयांनी घटले. 25 जून रोजी बीएसईवरील एकूण बाजार भांडवल 474.62 लाख कोटी रुपये होते. ते सोमवारी घसरून 474.08 लाख कोटी रुपयांवर आले. परिणामी, गुंतवणूकदारांच्या संपत्तीत सुमारे 53 हजार कोटी रुपयांची घट झाली.

बीईएल, एटर्नल आणि ट्रेंट तेजीत –

 

सेन्सेक्समधील 30 समभागांपैकी 14 समभाग वाढीसह बंद झाले. त्यामध्ये बीईएल, झोमॅटोची मूळ कंपनी एटर्नल आणि ट्रेंट या समभागांनी सर्वाधिक वाढ नोंदविली. तर कोटक महिंद्रा बँक, महिंद्रा अँड महिंद्रा (एमअँडएम) आणि मारुती सुझुकी या समभागांमध्ये सर्वाधिक घसरण झाली.

166 समभाग वर्षभरातील उच्चांकावर –

बीएसईवर सोमवारी एकूण 4,559 समभागांमध्ये व्यवहार झाले. त्यापैकी 1,725 समभाग वधारले, तर 2,613 समभाग घसरले. 221 समभागांमध्ये कोणताही बदल झाला नाही. याशिवाय, 166 समभागांनी वर्षभरातील उच्चांक गाठला, तर 98 समभाग वर्षभरातील नीचांकी पातळीवर पोहोचले.