Stock Market : देशांतर्गत शेअर बाजारात बुधवारी जोरदार खरेदी पाहायला मिळाली. आयटी आणि मेटल क्षेत्रातील समभागांच्या जोरदार कामगिरीमुळे सेन्सेक्समध्ये ८८८.६८ अंकांची, तर निफ्टीमध्ये २६४.८५ अंकांची वाढ नोंदली गेली. या तेजीमुळे बीएसईवरील सूचीबद्ध कंपन्यांचे एकूण बाजारभांडवल तब्बल ₹४.२७ लाख कोटींनी वाढले असून, गुंतवणूकदारांच्या संपत्तीत मोठी भर पडली.

दिवसभराच्या व्यवहारात सेन्सेक्सने ९९९.५७ अंकांची झेप घेत ७७,७६५.४९ या उच्चांकी पातळीला स्पर्श केला. अखेरीस तो ७७,६५४.६० वर बंद झाला. दुसरीकडे, निफ्टीने व्यवहारादरम्यान २४,२८३.५५ पर्यंत मजल मारल्यानंतर २४,२५०.२० वर स्थिरावला.

व्यापक बाजारातही सकारात्मक वातावरण कायम राहिले. निफ्टी मिडकॅप १०० निर्देशांक ०.८२ टक्क्यांनी, तर निफ्टी स्मॉलकॅप १०० निर्देशांक सुमारे १.५ टक्क्यांनी वधारला.

आयटी आणि मेटल क्षेत्राचा बाजाराला भक्कम आधार –   (Stock Market)

क्षेत्रनिहाय पाहता, निफ्टी आयटी आणि निफ्टी मेटल निर्देशांक प्रत्येकी २ टक्क्यांहून अधिक वाढले. याशिवाय एफएमसीजी निर्देशांक दीड टक्क्यांपेक्षा अधिक, फार्मा सुमारे दीड टक्का, प्रायव्हेट बँक १ टक्क्यांहून अधिक आणि पीएसयू बँक निर्देशांक ०.४० टक्क्यांनी वधारला.

एका दिवसात ₹४.२७ लाख कोटींची भर –  (Stock Market)

२८ जुलै रोजी बीएसईवरील सूचीबद्ध कंपन्यांचे एकूण बाजारभांडवल ₹४,७९,०७,९१७.४४ कोटी होते. बुधवारी ते वाढून ₹४,८३,३५,३३०.५५ कोटींवर पोहोचले. परिणामी, एका दिवसात गुंतवणूकदारांच्या संपत्तीत ₹४,२७,४१३.११ कोटींची वाढ झाली.

सेन्सेक्समधील २५ समभाग तेजीत –   (Stock Market)

सेन्सेक्समधील ३० पैकी २५ समभाग वाढीसह बंद झाले. एचयूएल, इन्फोसिस आणि ट्रेंट यांच्या समभागांनी सर्वाधिक वाढ नोंदवली. तर अदानी पोर्ट्स, महिंद्रा अँड महिंद्रा (एम अँड एम) आणि पॉवरग्रिड यांच्या समभागांमध्ये सर्वाधिक घसरण झाली.

१०७ समभाग वर्षभरातील उच्चांकावर –  (Stock Market)

बीएसईवर दिवसभरात ४,४२४ समभागांमध्ये व्यवहार झाले. त्यापैकी २,५९३ समभाग वधारले, १,६५२ घसरले, तर १७९ समभागांमध्ये कोणताही बदल झाला नाही. याशिवाय १०७ समभागांनी वर्षभरातील उच्चांक, तर ७७ समभागांनी वर्षभरातील नीचांकी पातळी गाठली. तसेच ९ समभाग अपर सर्किट, तर ७ समभाग लोअर सर्किटमध्ये बंद झाले.