Stock Market : भू-राजकीय तणावात आलेली नरमाई, कच्च्या तेलाच्या किमतीतील घसरण आणि आशियाई बाजारातील सकारात्मक वातावरणाच्या पार्श्वभूमीवर आठवड्याच्या पहिल्याच दिवशी देशांतर्गत शेअर बाजाराने जोरदार पुनरागमन केले.

माहिती-तंत्रज्ञान (आयटी) क्षेत्राच्या भक्कम कामगिरीमुळे सोमवारी सेन्सेक्स आणि निफ्टी दोन्ही निर्देशांक वाढीसह बंद झाले. यामुळे गुंतवणूकदारांच्या संपत्तीत तब्बल ₹3.54 लाख कोटींची भर पडली.

बीएसईचा सेन्सेक्स 291.17 अंकांनी (0.38 टक्के) वधारून 77,094.07 अंकांवर बंद झाला, तर एनएसईचा निफ्टी 50 निर्देशांक 89.80 अंकांनी (0.37 टक्के) वाढत 24,102.90 अंकांवर स्थिरावला. व्यवहारादरम्यान सेन्सेक्सने 77,325.56 आणि निफ्टीने 24,168.05 या उच्चांकाला स्पर्श केला.

क्षेत्रनिहाय पाहता, एफएमसीजी आणि कन्झ्युमर ड्युरेबल्स वगळता सर्वच क्षेत्रीय निर्देशांक वाढीसह बंद झाले. आयटी क्षेत्रातील निर्देशांकात एक टक्क्यांहून अधिक वाढ नोंदविण्यात आली. टेक महिंद्रा आणि सन फार्मा हे सेन्सेक्सवरील सर्वाधिक तेजीत असलेले समभाग ठरले, तर एशियन पेंट्स, टायटन आणि पॉवरग्रिडमध्ये घसरण झाली.

गुंतवणूकदारांच्या संपत्तीत ₹3.54 लाख कोटींची भर –

बीएसईवरील सूचीबद्ध कंपन्यांचे एकूण बाजार भांडवल 19 जून रोजी ₹476.96 लाख कोटी होते. सोमवारी ते वाढून ₹480.50 लाख कोटींवर पोहोचले. परिणामी गुंतवणूकदारांच्या संपत्तीत ₹3.54 लाख कोटींची भर पडली.

दरम्यान, बीएसईवर व्यवहार झालेल्या 4,586 समभागांपैकी 2,635 समभाग वधारले, तर 1,754 समभाग घसरले. 217 समभागांनी वर्षभरातील उच्चांक गाठला, तर 64 समभाग वर्षभरातील नीचांकी स्तरावर पोहोचले.