Stock Market: अमेरिकेचे राष्ट्राध्यक्ष डोनाल्ड ट्रम्प यांनी घेतलेल्या एका आक्रमक भूमिकेमुळे भारतीय शेअर बाजारात आज सलग चौथ्या दिवशी मोठी पडझड पाहायला मिळाली. रशियाकडून कच्चे तेल खरेदी करणाऱ्या देशांवर ५०० टक्क्यांपर्यंत आयात शुल्क म्हणजेच टॅरिफ लावण्याच्या विधेयकाला ट्रम्प यांनी पाठिंबा दर्शवला आहे. या बातमीने बाजारात भीतीचे वातावरण पसरले आणि सत्राच्या अखेरीस मुंबई शेअर बाजाराचा निर्देशांक सेन्सेक्स ७८०.१८ अंकांच्या घसरणीसह ८४,१८०.९६ वर बंद झाला. राष्ट्रीय शेअर बाजाराच्या निफ्टीमध्येही २६३.९० अंकांची मोठी घसरण होऊन तो २५,८७६.८५ अंकांवर स्थिरावला. ८ डिसेंबरनंतरची ही शेअर बाजारातील एका दिवसातील सर्वात मोठी घसरण ठरली आहे. गेल्या चार दिवसांपासून सुरू असलेल्या या घसरणीच्या सत्रामुळे गुंतवणूकदारांचे प्रचंड नुकसान झाले असून, गुंतवणूकदारांचे सुमारे ७.१९ लाख कोटी रुपये या काळात बुडाले आहेत. बीएसईवर सूचीबद्ध असलेल्या कंपन्यांचे एकूण बाजार भांडवल घसरून ४७४ लाख कोटी रुपयांवर आले आहे. अमेरिकेचे राष्ट्राध्यक्ष डोनाल्ड ट्रम्प यांनी रशियाकडून तेल खरेदी करणाऱ्या देशांवर कडक निर्बंध लादणाऱ्या विधेयकाला मंजुरी दिली आहे. सीनेटर लिंडसे ग्रॅहम यांनी दावा केला आहे की या विधेयकावर पुढील आठवड्यात मतदान होऊ शकते. रशियाकडून स्वस्त तेल खरेदी करून पुतीन यांच्या युद्ध यंत्रणेला बळ देणाऱ्या भारत, चीन आणि ब्राझीलसारख्या देशांवर कर वाढवण्याचे अधिकार यामुळे राष्ट्राध्यक्षांना मिळणार आहेत. बाजारातील या पडझडीत देशातील सर्वात मोठी कंपनी असलेल्या रिलायन्स इंडस्ट्रीजच्या शेअरमध्ये २.२५ टक्क्यांची घसरण झाली. त्यासोबतच टीसीएस, महिंद्रा अँड महिंद्रा, लार्सन अँड टुब्रो आणि टाटा स्टील यांसारख्या दिग्गज कंपन्यांचे शेअर्सही मोठ्या प्रमाणात कोसळले. दुसरीकडे ईटरनल, आयसीआयसीआय बँक, बजाज फायनान्स आणि बीईएल यांसारख्या मोजक्या शेअर्समध्ये तेजी दिसून आली. केवळ बड्या कंपन्याच नव्हे, तर मिडकॅप आणि स्मॉलकॅप निर्देशांकातही सुमारे २ टक्क्यांची घसरण नोंदवली गेली. ट्रम्प यांच्या टॅरिफ धोरणाव्यतिरिक्त व्हेनेझुएलातील राजकीय संकट आणि जागतिक बाजारपेठांमधील कमकुवत संकेतांनी भारतीय बाजारातील आगीत तेल ओतण्याचे काम केले आहे.
