Stock Market: सलग दोन दिवसांच्या तेजीनंतर आज भारतीय शेअर बाजारात किरकोळ घसरण नोंदवली गेली. कमकुवत जागतिक संकेत आणि उच्च पातळीवरील नफा वसुलीमुळे सेन्सेक्स आणि निफ्टीवर दबाव दिसून आला. अमेरिका-चीनमधील व्यापार तणाव वाढल्याने गुंतवणूकदारांच्या भावनांवर परिणाम झाला. मात्र, ऑटो, फायनान्शियल आणि टेलिकॉम क्षेत्रातील निवडक खरेदीने बाजाराला आधार दिला. यामुळे गुंतवणूकदारांच्या संपत्तीत 41,000 कोटींची वाढ झाली.

आज बॉम्बे स्टॉक एक्सचेंज (BSE) मध्ये एकूण 4,459 शेअर्सची खरेदी-विक्री झाली. त्यापैकी 1,668 शेअर्स वाढीसह, तर 2,624 शेअर्स घसरणीसह बंद झाले. 163 शेअर्स स्थिर राहिले. व्यवहार बंद होताना सेन्सेक्स 173.8 अंकांनी घसरून 82,327 वर, तर निफ्टी 58 अंकांनी घसरून 25,227.4 वर बंद झाला. बीएसई स्मॉलकॅप निर्देशांक 0.43% नी घसरला.

निफ्टी एफएमसीजी आणि निफ्टी आयटी निर्देशांक अनुक्रमे 0.9% आणि 0.8% नी घसरले. ग्राहकोपयोगी वस्तू आणि ऊर्जा क्षेत्रेही दबावाखाली राहिली. दुसरीकडे, अ‍ॅक्सिस बँक आणि एसबीआयच्या नेतृत्वाखाली निफ्टी बँक निर्देशांक 0.1% च्या किरकोळ वाढीसह हिरव्या रंगात बंद झाला. पीएसयू बँक आणि प्रायव्हेट बँक निर्देशांकही अनुक्रमे 0.2% आणि 0.1% च्या वाढीसह बंद झाले.

बीएसई सूचीबद्ध कंपन्यांचे एकूण बाजार भांडवल 462.08 लाख कोटींवरून 462.49 लाख कोटी रुपये झाले. यामुळे गुंतवणूकदारांच्या संपत्तीत 41,000 कोटींची वाढ झाली.सेन्सेक्समधील 30 पैकी 12 शेअर्स वाढले. अदानी पोर्ट्समध्ये सर्वाधिक 2.04% वाढ झाली, तर बजाज फायनान्स, बजाज फिनसर्व्ह, अ‍ॅक्सिस बँक आणि भारती एअरटेल 0.68% ते 1.32% नी वधारले. उर्वरित 18 शेअर्स घसरणीसह बंद झाले. टाटा मोटर्स 2.67% नी घसरून सर्वाधिक तोट्यात राहिला. हिंदुस्तान युनिलिव्हर, इन्फोसिस, पॉवर ग्रिड आणि भारत इलेक्ट्रॉनिक्स 0.94% ते 1.46% नी घसरले.