मुंबई  – अमेरिकेने युक्रेनला लांब पल्ल्याची क्षेपणास्त्रे पुरविली होती. मात्र ती वापरण्याची परवानगी दिली नव्हती. आता ही क्षेपणास्त्रे रशियाविरुद्ध वापरण्याची परवानगी अमेरिकेने युक्रेनला दिली आहे. यामुळे हे युद्ध चिघळण्याची शक्यता वाढली आहे. या कारणामुळे अमेरिका, युरोप आणि आशिया खंडातील बर्‍याच देशातील शेअर बाजाराचे निर्देशांक कमी झाले. भारतीय शेअर बाजाराचे निर्देशांकही सलग सातव्या दिवशी कमी झाले.

जर युक्रेन ने रशिया विरुद्ध लांब पल्ल्याची क्षेपणास्त्रे वापरली आणि रशियावर आतपर्यंत केला तर तिसरे महायुद्ध सुरू होईल आणि याची जबाबदारी अमेरिकेवर असेल असा इशारा रशियाने दिला आहे. याचे नकारात्मक प्रतिपडसाद विविध बाजारावर उमटले. त्याचबरोबर डोनाल्ड ट्रम्प यांच्या बेफाम धोरणामुळे अमेरिकेतील महागाई वाढणार असल्यामुळे व्याजदर कपातीची मोहीम थंडावणार असल्याचे संकेत फेडरल रिझर्वचे अध्यक्ष जेरोम पावेल यांनी दिले आहेत. या कारणामुळेही जागतिक शेअर बाजारावर परिणाम झाला.

बाजार बंद होताना मुंबई शेअर बाजाराचा निर्देशांक सेन्सेक्स 241 अंकांनी कमी होऊन 77,339 अंकावर बंद झाला. राष्ट्रीय शेअर बाजाराचा निर्देशांक निफ्टी 78 अंकांनी म्हणजे 0.34 टक्क्यांनी कमी होऊन 23,453 अंकावर बंद झाला. अमेरिकेतील व्याजदर कपात कमी होणार असल्यामुळे अमेरिकेला निर्यात करणार्‍या माहिती तंत्रज्ञान क्षेत्राचा निर्देशांक 2.34 टक्क्यांनी कमी झाला.

सिटी बँकेकडून मानांकन कमी –

सीएलएसए या ब्रोकरेज संस्थेने भारताचे मानांकन वाढविले असताना सिटी बँक या ब्रोकरेज संस्थेने भारतीय शेअर बाजाराचे निर्देशांक आवश्यकतेपेक्षा जास्त असल्याचे म्हटल्यामुळे गुंतवणूकदारावर परिणाम झाला.

पावेल यांचे वक्तव्य –
फेडरल रिझर्वचे अध्यक्ष जेरोम पावेल यांनी महागाई वाढणार असल्यामुळे आगामी काळात व्याजदर कपात करताना काळजी घ्यावी लागेल असे विधान केल्यामुळे अमेरिकन डॉलरवर आणि कर्जरोख्यावर याचा परिणाम होण्याची शक्यता आहे. त्यामुळे परदेशी गुंतवणूकदार अस्वस्थ झाले आहेत.

परदेशी गुंतवणूकदाराकडून विक्री –
गुरुवारी परदेशी संस्थागत गुंतवणूकदारांनी 1,849 कोटी रुपयांच्या शेअरची विक्री केली. नोव्हेंबर महिन्यात या गुंतवणूकदारांनी आतापर्यंत 22,420 कोटी रुपयांच्या शेअरची विक्री केली.

अस्थिरता निर्देशांक वाढला –
डोनाल्ड ट्रम्प यांनी अनुभव आणि कौशल्य नसलेले लोक महत्त्वाच्या पदावर नियुक्त केले. रशिया -युक्रेन युद्ध वाढण्याची शक्यता आहे. अशा परिस्थितीत शेअर बाजाराचा अस्थिरता निर्देशांक पाच टक्क्यांनी वाढून 15.51 वर गेला.

रुपयाच्या घसरणीचा परिणाम –
डॉलर वधारत असल्यामुळे डॉलर इंडेक्स आता 106.6 अंकावर गेला आहे. अमेरिकेच्या कर्जरोख्यावरील परतावा वाढून 4.44% झाला. अशा परिस्थितीत परदेशी गुंतवणूकदार नजीकच्या भविष्यात भारताकडे वळणार नाहीत अशी परिस्थिती निर्माण झाली आहे.