Stock Market – भारत -पाकिस्तान दरम्यान तणाव निर्माण झाला आहे. अशा परिस्थितीत संरक्षण क्षेत्रासाठी उत्पादने तयार करणार्‍या कंपन्यांच्या शेअरच्या भावात गेल्या काही दिवसापासून वेगात वाढ होत असल्याचे दिसून येत आहे. आयडियाफाजर्र् या कंपनीच्या शेअरचा भाव तब्बल 18 टक्क्यांनी वाढला. संरक्षण क्षेत्रातील इतर कंपन्यांच्या शेअरच्या भावातही वाढ होताना दिसून येत आहे.
भारतीय लष्कराने बुधवारी पाकिस्तानात लष्करी तळावर हल्ले केल्यानंतर काल पाकिस्तानने भारतातील पंधरा ठिकाणी ड्रोन आणि क्षेपणास्त्राद्वारा हल्ले केले. भारताने हे हल्ले निकामी केले. त्यामध्ये कसलीही मनुष्य किंवा वित्तहानी झालेली नाही. आता भारत पाकिस्तान विरोधात पुन्हा कारवाई करत आहे.

अशा परिस्थितीत संरक्षण क्षेत्रातील उत्पादनाची मागणी वाढत जाणार आहे. संरक्षण विभागांला विभागाला उपकरणे पुरवणार्‍या अनेक कंपन्या भारतात कार्यरत आहेत. त्याचबरोबर ड्रोन तयार करणार्‍या आणि ते चालवण्याचे प्रशिक्षण देणार्‍या कंपन्या भारतात आहेत. या कंपन्यांच्या शेअरची खरेदी वाढली. क्षेपणास्त्र व ड्रोन द्वारा हल्ले करण्याबरोबरच प्रत्यक्ष नियंत्रण रेषेवर पाकिस्तानी लष्कर युद्धबंदीचा भंग करून हल्ले करत आहे.

भारत डायनामिक कंपनीचा शेअर 9.73 टक्क्यांनी, पारस डिफेन्स अँड स्पेस टेक्नॉलॉजी कंपनीचा शेअर 5.89 टक्क्यांनी, भारत इलेक्ट्रॉनिक्स कंपनीचा शेअर 4.88 टक्क्यांनी, गार्डन रिच शीपबिल्डर्स अँड इंजिनियर्स कंपनीचा शेअर 3.63 टक्क्यांनी, हिंदुस्थान एरोनॉटिक्स कंपनीचा शेअर 3.7 टक्क्यांनी वाढला होता.

ड्रोन उत्पादन क्षेत्रातील आयडिया फोर्ज कंपनीच्या शेअरचा भाव 18 टक्क्यांनी वाढला. त्याचबरोबर द्रोणाचार्य इनोवेशन्स या कंपनीच्या शेअरचा भाव 4.99 टक्क्यांनी वाढला होता. भारतातील ड्रोन उत्पादक कंपन्या लष्कराला ड्रोनचा पुरवठा करण्याबरोबरच ड्रोन प्रशिक्षण, शत्रूचे ड्रोन पाडण्यासाठी तंत्रज्ञान उपलब्ध करत आहेत. त्यामुळे ड्रोन कंपन्यांच्या शेअरच्या भावात वाढ होत असल्याचे ब्रोकर्सनी सांगितले.

मुख्य निर्देशांकात एक टक्क्याची घट –
भारत-पाक तणाव वाढत चालला आहे. अशा परिस्थितीत अस्थिरता निर्देशांक वाढला आहे. त्यामुळे गुंतवणूकदार खरेदीबरोबर विक्री करीत आहेत. शुक्रवारी आठवड्याच्या कामकाजाच्या शेवटच्या दिवशी मुंबई शेअर बाजाराचा निर्देशांक सेन्सेक्स 880 अंकांनी कमी होऊन 79,454 अंकावर बंद झाला. राष्ट्रीय शेअर बाजाराचा निर्देशांक निफ्टी 265 अंकांनी म्हणजे 1.10 टक्क्यांनी कमी होऊन 24,008 अंकावर बंद झाला.