Stock Market : कच्च्या तेलाच्या किमती 100 डॉलर प्रति बॅरलच्या खाली आल्याने आणि बँकिंग क्षेत्रातील शेअर्ससह रिलायन्स इंडस्ट्रीजच्या शेअर्समध्ये झालेल्या खरेदीमुळे भारतीय शेअर बाजारात सलग दुसऱ्या दिवशी जोरदार तेजी राहिली. सेन्सेक्स 685.34 अंकांनी वाढून 73,067.81 अंकांवर बंद झाला. निफ्टी 220.35 अंकांनी वधारून 22,776.10 अंकांवर पोहोचला.

सेन्सेक्समधील 30 कंपन्यांमध्ये ट्रेंटचा शेअर सर्वाधिक 12.78 टक्क्यांनी वाढला. कोटक महिंद्रा बँक, हिंदुस्तान युनिलिव्हर, रिलायन्स इंडस्ट्रीज, इंडिगो, इटर्नल आणि एशियन पेंट्सच्या शेअर्समध्येही तेजी राहिली. टेक महिंद्रा, टायटन, बजाज फायनान्स आणि आयटीसी मात्र घसरले.

जागतिक बाजारातील कच्च्या तेलाचा प्रमुख दर असलेले ब्रेंट क्रूड 1.70 टक्क्यांनी घसरून 98.59 डॉलर प्रति बॅरलवर आले. त्यामुळे भारतीय बाजारावरील महागाई आणि इतर आर्थिक दबाव काहीसा कमी होण्याची अपेक्षा निर्माण झाली.

दरम्यान, सोमवारी परदेशी संस्थात्मक गुंतवणूकदारांनी (FII) भारतीय शेअर्समध्ये 4,699.14 कोटी रुपयांची विक्री केली.

₹3.60 लाख कोटींनी वाढली गुंतवणूकदारांची संपत्ती –

एक व्यावसायिक दिवस आधी म्हणजेच 5 ऑक्टोबर 2026 रोजी बीएसईवर (BSE) लिस्टेड सर्व शेअर्सचे एकूण मार्केट कॅप ₹4,70,06,442.80 कोटी होते. आज म्हणजेच 6 ऑक्टोबर 2026 रोजी हे वाढून ₹4,73,67,386.07 कोटींवर पोहोचले आहे. याचा अर्थ आज गुंतवणूकदारांच्या संपत्तीत ₹3,60,943.27 कोटींची वाढ झाली आहे.