Stock Market:  भारतीय शेअर बाजारात सोमवारी तेजी होती. सेन्सेक्स आणि निफ्टीने सलग तिसऱ्या सत्रात वाढ नोंदवत गुंतवणूकदारांना दिलासा दिला. आयटी, फार्मा आणि बँकिंग क्षेत्रातील खरेदीमुळे बाजाराला पूर्ण आधार मिळाला, तर धातू आणि एफएमसीजी क्षेत्रात सौम्य घसरण दिसली. यामुळे गुंतवणूकदारांच्या संपत्तीत २.०१ लाख कोटी रुपयांची भर पडली.

व्यवहार संपताना सेन्सेक्स ५८२.९५ अंकांनी वधारून ८१,७९०.१२ वर बंद झाला. दुसरीकडे, निफ्टीने १८३.४० अंकांची वाढ नोंदवत २५,००० ची पातळी पुन्हा गाठली आणि २५,०७७.६५ वर स्थिरावला. बीएसई मिडकॅप निर्देशांक ०.७ टक्क्यांनी वाढला, तर स्मॉलकॅप निर्देशांक किंचित घसरला. निफ्टी आयटी निर्देशांकाने २ टक्क्यांची वाढ नोंदवली, तर आरोग्यसेवा निर्देशांक १ टक्क्यांनी मजबूत झाला. खाजगी बँकिंग निर्देशांक १.२ टक्क्यांनी आणि तेल-वायू क्षेत्र ०.७ टक्क्यांनी वाढले, तर सार्वजनिक क्षेत्रातील बँकिंग निर्देशांक ०.४ टक्क्यांनी पुढे सरकला.

मात्र, धातू, मीडिया आणि एफएमसीजी क्षेत्रांत ०.३ ते ०.९ टक्क्यांपर्यंत सौम्य विक्री दिसली. बीएसईवर एकूण ४,४४९ शेअर्सची खरेदी-विक्री झाली, ज्यात १,८२७ शेअर्स वाढीसह बंद झाले. याउलट, २,४५३ शेअर्स घसरणीसह संपले, तर १६९ शेअर्स स्थिर राहिले. सूचीबद्ध कंपन्यांचे एकूण बाजार भांडवल ४५७.८१ लाख कोटींवरून वाढत ४५९.८२ लाख कोटी रुपयांवर पोहोचले. याचा थेट फायदा गुंतवणूकदारांना झाला, ज्यांच्या एकूण संपत्तीत २.०१ लाख कोटी रुपयांची वाढ झाली.

सेन्सेक्सच्या ३० पैकी २० शेअर्स वाढीसह बंद झाले. यात टीसीएसने आघाडी घेत २.९६ टक्क्यांची सर्वोत्तम वाढ नोंदवली. त्यानंतर टेक महिंद्रा, अ‍ॅक्सिस बँक, इटरनल आणि इन्फोसिसचे शेअर्स १.९८ ते २.६२ टक्क्यांपर्यंत वाढले. दुसरीकडे, १० शेअर्स घसरले, ज्यात टाटा स्टीलने १.८८ टक्क्यांची सर्वाधिक घसरण केली. अदानी पोर्ट्स, पॉवर ग्रिड, टायटन आणि ट्रेंटचे शेअर्स ०.९१ ते १.२३ टक्क्यांपर्यंत खाली आले. बाजार तज्ज्ञांच्या मते, जागतिक संकेत आणि देशांतर्गत आर्थिक स्थैर्यामुळे ही वाढ कायम राहण्याची शक्यता आहे.