Stock Market Sensex 40: शेअर बाजारातील गुंतवणुकीचे नाव काढले की डोळ्यासमोर येतो तो ‘सेंसेक्स’. भारताच्या या सर्वात लोकप्रिय निर्देशांकाने (Index) आपल्या प्रवासाची ४० वर्षे पूर्ण केली आहेत. १ जानेवारी १९८६ ला सुरू झालेला हा सेंसेक्स आज करोडो गुंतवणूकदारांच्या संपत्तीत वाढ करणारा एक विश्वासार्ह मार्ग ठरला आहे. १० हजारांचे १५.७ लाख कसे झाले? सोप्या भाषेत सांगायचे तर, जर ४० वर्षांपूर्वी (१९८६ मध्ये) एखाद्या व्यक्तीने सेंसेक्समध्ये फक्त १० हजार रुपये गुंतवले असते, तर आज त्या पैशांची किंमत तब्बल १५ लाख ७० हजार रुपये झाली असती. ही वाढ इतकी मोठी आहे की, गुंतवणुकीच्या बाबतीत सुरक्षित मानल्या जाणाऱ्या बँक एफडीलाही (FD) सेंसेक्सने मागे टाकले आहे. काय आहे सेंसेक्सचे गणित? १९८६ मध्ये सेंसेक्स अवघ्या ५००-५५० अंकांच्या आसपास होता. आज तो ८६,००० अंकांच्या जवळ पोहोचला आहे. वर्षाला सरासरी १५% दराने याने गुंतवणूकदारांना नफा दिला आहे. ३० मोठ्या कंपन्यांचा आधार सेंसेक्स म्हणजे काय? तर भारतातील सर्वात मोठ्या आणि आर्थिकदृष्ट्या मजबूत अशा ३० कंपन्यांचा समूह. रिलायन्स, टाटा, एचडीएफसी सारख्या मोठ्या कंपन्यांच्या चढ-उतारावरून सेंसेक्सची पातळी ठरते. जर या कंपन्या प्रगती करत असतील, तर सेंसेक्स वाढतो आणि पर्यायाने तुमची गुंतवणूकही वाढते. सेबीचे (SEBI) अध्यक्ष तुहिन कांता पांडे यांच्या मते, सेंसेक्सने गेल्या ४० वर्षांत भारताच्या आर्थिक विकासाचा आरसा म्हणून काम केले आहे. बाजार आता पूर्वीपेक्षा अधिक पारदर्शक आणि आधुनिक झाला असून, सर्वसामान्यांचाही यात सहभाग वाढत आहे. थोडक्यात सांगायचे तर गेल्या ४० वर्षात बँकेतील मुदत ठेवींपेक्षा शेअर बाजारातील या ‘सेंसेक्स’ने लोकांना जास्त श्रीमंत केले आहे.
