Stock Market: – जागतिक बाजारातील कमजोरी आणि अमेरिकेचे राष्ट्राध्यक्ष डोनाल्ड ट्रम्प यांच्या व्यापारी देशांवरील टॅरिफच्या घोषणेच्या पार्श्वभूमीवर भारतीय शेअर बाजार बुधवारी पुन्हा घसरणीसह बंद झाला. रिझर्व्ह बँक ऑफ इंडियाने (आरबीआय) रेपो रेटमध्ये ०.२५% कपात करून तो ६.०% केला असला, तरी बाजारात फारसा सकारात्मक परिणाम दिसला नाही. ट्रम्प यांच्या फार्मा क्षेत्रावरील टॅरिफच्या घोषणेमुळे औषध कंपन्यांच्या शेअरवर नकारात्मक परिणाम झाला आणि निफ्टी फार्मा इंडेक्स २% घसरला. बीएसई सेंसेक्स १०० अंकांच्या घसरणीसह ७४,१०३.८३ वर उघडला आणि दिवसभरात ७३,६७३.०६ पर्यंत खाली आला. अखेरीस ३७९.९३ अंकांनी (०.५१%) घसरून ७३,८४७.१५ वर बंद झाला. त्याचप्रमाणे, एनएसई निफ्टी १३६.७० अंकांनी (०.६१%) घसरून २२,३९९.१५ वर बंद झाला. अमेरिका-चीन व्यापारी तणाव वाढला असून, ट्रम्प यांनी चीनवर १०४% टॅरिफ लादण्याची घोषणा केली. यामुळे जागतिक व्यापारी अनिश्चितता वाढली. गेल्या तीन दिवसांत रुपया १.४५ ने घसरून ८६.६९ वर बंद झाला. परदेशी संस्थात्मक गुंतवणूकदारांनी (एफआयआय) ४,९९४.२४ कोटींची विक्री केली, तर देशांतर्गत गुंतवणूकदारांनी ३,०९७.२४ कोटींची खरेदी केली. मंगळवारी बाजारात रिकव्हरी दिसली होती, जिथे सेंसेक्स १,०८९.१८ अंकांनी वधारून ७४,२२७.०८ वर बंद झाला होता. आयटी, मेटल, फार्मा आणि पीएसयू बँकांच्या शेअरमध्ये जोरदार पडझड झाली. यामुळे गुंतवणूकदारांचे तब्बल २.६१ लाख कोटी रुपयांचे नुकसान झाले. बीएसईवरील कंपन्यांचे एकूण मार्केट कॅप ३९६.५७ लाख कोटींवरून ३९३.९६ लाख कोटींवर घसरले. आरबीआयने चालू आर्थिक वर्षासाठी जीडीपी वाढीचा अंदाज ६.७% वरून ६.५% केला, तसेच अमेरिकेने भारतीय वस्तूंवर २६% टॅरिफ लागू केल्याने गुंतवणूकदार सावध झाले. मिडकॅप आणि स्मॉलकॅप निर्देशांकही १% खाली आले. बीएसईवर ४,०३० शेअरमध्ये व्यवहार झाले, त्यापैकी १,५३४ शेअर वधारले, तर २,३५२ शेअर घसरणीसह बंद झाले. ५७ शेअरांनी ५२ आठवड्यांचा उच्चांक गाठला, तर ७८ शेअरांनी नीचांक गाठला. सेंसेक्समधील ३० पैकी १३ शेअर वधारले. नेस्ले इंडियाच्या शेअरमध्ये ३.२४% वाढ झाली, तर हिंदुस्तान युनिलिव्हर, पॉवर ग्रिड, टायटन आणि अल्ट्राटेक सिमेंट ०.९५% ते २.५२% वधारले. दुसरीकडे, स्टेट बँक ऑफ इंडियाचा शेअर ३.४०% घसरला. टेक महिंद्रा, एल अँड टी, टाटा स्टील आणि सन फार्मा २.१८% ते ३.३५% खाली आले. बाजारातील अनिश्चिततेमुळे गुंतवणूकदारांमध्ये चिंता वाढली आहे.
