Stock Market:  भारत आणि अमेरिकेदरम्यान व्यापार कराराच्या चर्चेला पुन्हा सुरुवात झाल्याने बाजारातील सकारात्मक वातावरणाला बळ मिळाले. जागतिक बाजारातून संमिश्र संकेत मिळत असताना भारतीय शेअर बाजार बुधवारी (१७ सप्टेंबर) सलग दुसऱ्या सत्रात मजबूतीसह बंद झाला.

आयटी क्षेत्रात खरेदी आणि पीएसयू बँकांच्या शेअर्समधील वाढीमुळे बाजाराला चालना मिळाली. मात्र, अमेरिकेच्या फेडरल रिझर्व्हच्या व्याजदर निर्णयापूर्वी गुंतवणूकदार सावध भूमिका घेत आहेत. फेडरल रिझर्व्ह आज बुधवारी व्याजदराबाबत निर्णय जाहीर करणार असून, तज्ज्ञांच्या मते, यात कपात होण्याची शक्यता आहे.

बीएसई सेन्सेक्स ८२,५०६.४० वर मजबूत उघडला आणि ३१३.०२ अंकांनी (०.३८%) वाढून ८२,६९३.७१ वर बंद झाला. त्याचप्रमाणे, एनएसईचा निफ्टी-५० २५,२७६ वर उघडला आणि ९१.१५ अंकांनी (०.३६%) वधारून २५,३३० वर स्थिरावला. आज बाजार मर्यादित श्रेणीत व्यवहार करून हलक्या तेजीसह बंद झाला. आयटी, बँकिंग आणि ऑटो क्षेत्रात तेजी दिसली, तर मेटल, एफएमसीजी आणि फार्मा क्षेत्रात नफावसुली झाली.

धोरणात्मक सुधारणा आणि मजबूत देशांतर्गत गुंतवणुकीमुळे सकारात्मक वातावरण आहे. मात्र, परदेशी संस्थात्मक गुंतवणूकदारांच्या (एफआयआय) सातत्यपूर्ण विक्रीमुळे आणि फेडरल रिझर्व्हच्या निर्णयापूर्वीच्या सावधपणामुळे तेजीवर मर्यादा आल्या.

टॉप गेनर्स आणि लुझर्स: सेन्सेक्समधील एसबीआय, भारत इलेक्ट्रॉनिक्स, कोटक महिंद्रा बँक आणि ट्रेंट हे शेअर्स सर्वाधिक वाढले, तर टायटन, आयटीसी, बजाज फिनसर्व्ह आणि टाटा स्टील घसरले. ब्रॉडर मार्केटमध्ये बीएसई मिडकॅप ०.०८% आणि स्मॉलकॅप ०.६८% वाढले. निफ्टी पीएसयू बँक इंडेक्स २.६१% आणि निफ्टी आयटी ०.६५% वधारले, तर निफ्टी मेटल ०.५% घसरला.

जागतिक बाजार: आशियाई बाजारात घसरण दिसली. जपानचा निक्केई स्थिर राहिला, तर टॉपिक्स ०.५३% घसरला. कोस्पी आणि एएसएक्स २०० अनुक्रमे ०.९४% आणि ०.६३% खाली बंद झाले. अमेरिकेत एसएंडपी ५०० ०.१३% आणि नैस्डॅक ०.०७% घसरले.

आयपीओ: अर्बन कंपनी, देव्ह ॲक्सिलरेटर आणि श्रींगार हाऊस ऑफ मंगलसुत्र यांचे शेअर्स बुधवारी बाजारात पदार्पण करणार असून, अर्बन कंपनीच्या ५०% प्रीमियमसह मजबूत सुरुवातीची अपेक्षा आहे.