मुंबई – जागतिक व्यापार युद्धाच्या (टॅरिफ वॉर) तणावामुळे आणि कमकुवत आंतरराष्ट्रीय संकेतांमुळे भारतीय शेअर बाजारात सोमवारी प्रचंड घसरण झाली. सेंसेक्स आणि निफ्टी हे दोन्ही प्रमुख निर्देशांक मोठ्या घसरणीसह बंद झाले. सेंसेक्समध्ये २२२७ अंकांची घसरण होऊन तो ७२,१३८ वर स्थिरावला, तर निफ्टी ६६२ अंकांनी खाली येऊन २२,२४२ वर बंद झाला. आजच्या व्यवहारात निफ्टीवरील बँक, वित्तीय, ऑटो, आयटी, मेटल, फार्मा आणि रियल्टीसह सर्व प्रमुख क्षेत्रे लाल निशानात राहिली.

या घसरणीत टॉप गेनर फक्त झोमॅटो (ZOMATO) ठरला, तर टॉप लूझर्समध्ये टाटा स्टील (TATASTEEL), टाटा मोटर्स (TATAMOTORS), एल अँड टी (LT), कोटक बँक (KOTAKBANK), ॲक्सिस बँक (AXISBANK) आणि महिंद्रा अँड महिंद्रा (M&M) यांचा समावेश आहे.

अमेरिकेच्या प्रत्युत्तर टॅरिफ धोरणामुळे अमेरिका, आशिया आणि युरोपातील बाजारांवरही दबाव दिसून आला. ब्रेंट क्रूडचे दर ६४ डॉलर प्रति बॅरलखाली घसरले आहेत.

जागतिक संकेत कमकुवत –
आज जागतिक बाजारांचे संकेत अत्यंत कमकुवत राहिले. आशियाई बाजारांमध्ये मोठी विक्री दिसली, तर शुक्रवारी अमेरिकी बाजारातही घसरण झाली होती. GIFT निफ्टीत ४% घसरण झाली, तर निक्केई २२५ मध्ये ६.९३% आपटका दिसला. शुक्रवारी डाऊ जोन्स २२३१ अंकांनी (५.५०%) घसरून ३८,३१४.८६ वर बंद झाला होता.

सेंसेक्स-निफ्टीची घसरण –
सेंसेक्स आज ४,००० अंकांपर्यंत खाली येऊन ७१,४४९.९४ वर उघडला आणि दिवसभरात ७१,४२५.०१ पर्यंत घसरला. अखेरीस तो २२२६.७९ अंकांनी (२.९५%) खाली येऊन ७३,१३७.९० वर बंद झाला. निफ्टी १,००० अंकांहून अधिक घसरणीसह २१,७५८.४० वर उघडला आणि २१,७४३.६५ पर्यंत खाली आला. शेवटी तो ७४२.८५ अंकांनी (३.२४%) घसरून २२,१६१.६० वर स्थिरावला. ही ४ जून २०२४ नंतरची सर्वात मोठी घसरण ठरली.

गुंतवणूकदारांचे १३ लाख कोटी बुडाले –
या घसरणीमुळे गुंतवणूकदारांचे मोठे नुकसान झाले. बीएसईवरील कंपन्यांचे बाजार भांडवल ४,०४,०९,६०० लाख कोटींवरून ३,९०,७०,०८१.९२ लाख कोटी रुपयांवर घसरले. यामुळे गुंतवणूकदारांची १३,३９,५१९ कोटींची संपत्ती एका दिवसात गायब झाली.

घसरणीची कारणे काय?
१. अमेरिका-चीन टॅरिफ वॉर: अमेरिकेचे राष्ट्राध्यक्ष डोनाल्ड ट्रम्प यांनी चीनच्या निर्यातावर ५४% टॅरिफ लादले, तर बीजिंगने अमेरिकी आयातीवर ३४% टॅरिफ जाहीर केले.

२. महागाईचा धोका: विश्लेषकांच्या मते, टॅरिफमुळे अमेरिकेत महागाई वाढेल, मागणी घटेल आणि मंदीचा धोका वाढेल. बर्नस्टीनच्या अहवालानुसार, ६०% आयातीवर आता २०% पेक्षा जास्त शुल्क आहे.

३. परकीय गुंतवणुकीत घट: गेल्या पाच सत्रांपासून परकीय संस्थागत गुंतवणूकदार (FII) विक्री करत असून, यंदा १.५ ट्रिलियन रुपयांचा आउटफ्लो झाला. देशांतर्गत गुंतवणूकदारांनी १.९३ लाख कोटींची खरेदी केली.

शुक्रवारची स्थिती
शुक्रवारी सेंसेक्स ९३०.६७ अंकांनी (१.२२%) घसरून ७५,३६४.६९ वर आणि निफ्टी ३४५.६५ अंकांनी (१.४९%) खाली येऊन २२,९०४.४५ वर बंद झाला होता.

४ जूनची मोठी घसरण
४ जून २०२४ रोजी लोकसभा निवडणूक निकालांमुळे सेंसेक्स ४,३८९.७३ अंकांनी (५.७४%) घसरून ७२,०७९.०५ वर आणि निफ्टी १,३७९.४० अंकांनी (५.९३%) खाली येऊन २१,८८४.५० वर बंद झाला होता. भाजपाला बहुमत मिळणार नाही हे स्पष्ट झाल्याने ही घसरण झाली होती.