मुंबई – अमेरिकेचे अध्यक्ष डोनाल्ड ट्रम्प यांनी व्यापार युद्धात माघार घेणार नसल्याचे स्पष्ट केले आहे. उद्यापासून कॅनडा आणि मेक्सिकोच्या वस्तूवरील आयात शुल्क लागू होईल असे सांगितले आहे. त्याचबरोबर चीन विरोधात दहा टक्के अतिरिक्त शुल्क लावण्यात येणार आहे. या घटनेनंतर अमेरिकेसह जगातील विविध देशाच्या शेअर बाजाराचे निर्देशांक कोसळले. त्याचा परिणाम भारतावरही झाला. भारतीय शेअर बाजाराचे निर्देशांक अगोदरच बरेच कमी पातळीवर असल्यामुळे इतर देशाच्या तुलनेत भारतीय शेअर बाजाराचे कमी नुकसान झाले असल्याचे दिसून येते. बाजार बंद होताना मुंबई शेअर बाजाराचा निर्देशांक सेन्सेक्स 96 अंकांनी कमी होऊन 72,989 अंकावर बंद झाला. बर्याच कालावधीनंतर सेन्सेक्स 73 हजार अंकाच्या खाली आल्यानंतर गुंतवणूकदारांनी दुःख व्यक्त केले. राष्ट्रीय शेअर बाजाराचा निर्देशांक निफ्टी सलग दहाव्या सत्रात 36 अंकांनी म्हणजे 0.17% कमी होऊन 22,082 अंकावर बंद झाला. बर्याच वर्षानंतर हा निर्देशांक सलग 10 दिवस कमी झाला आहे. कंपन्यातील चढ -उतार कोणत्या कंपन्या पिछाडीवर बजाज फिनसर्व, एचसीएल टेक्नॉलॉजी, नेस्ले, एशियन पेंट्स, एअरटेल, सन फार्मा, इन्फोसिस, मारुती सुझुकी, टायटन, हिंदुस्तान युनिलिव्हर, रिलायन्स इंडस्ट्रीज या कंपन्यांनी सपाटून मार खाल्ला. बर्याच ब्ल्यूचीप कंपन्यांच्या शेअरचे भाव आता 52 आठवड्याच्या निचांकावर आहेत. दरम्यान झोमॅटो, स्टेट बँक, टाटा कन्सल्टन्सी सर्विसेस, अदानी पोर्टस, पावर ग्रीड, टाटा स्टील, एचडीएफसी बँकेच्या शेअरच्या भावात थोडीफार वाढ झाली. मात्र त्यामुळे निर्देशांक वाढण्यास मदत झाली नाही. करेक्शनचे बुडबुडे समाप्त दरम्यान आता शेअर बाजाराचे निर्देशांक यापेक्षा खाली घसरणार नाहीत असे समजणार्या विश्लेषकाची आणि गुंतवणूकदारांची संख्या वाढत आहे. फिनावेन्यू या कंपनीचे फंड मॅनेजर अभिषेक जयस्वाल यांनी सांगितले की, शेअर बाजारात अतिरिक्त वाढीचे आलेले बुडबुडे आता समाप्त होण्याच्या मार्गावर आहेत.त्यामुळे भारतीय शेअर बाजाराचे इतर देशाच्या तुलनेत आज कमी नुकसान झाले. त्याचबरोबर मुख्य निर्देशांक कमी झाले असले तरी स्मॉल कॅप 0.28 टक्क्यांनी आणि मिड कॅप 0.08 टक्क्यांनी वाढला असल्याच्या बाबीकडे त्यांनी लक्ष वेधले. कंपन्यांचे बाजार मूल्य वाढले आजची विक्री इजास्त सर्वसमावेशक नव्हती. बर्याच मिड कॅप व स्मॉल कॅप कंपन्यांच्या शेअरचे भाव वाढले. त्यामुळे मुंबई शेअर बाजारावर नोंदलेल्या कंपन्यांचे एकूण बाजार मूल्य 1.06 लाख कोटी रुपयांनी वाढून 385 लाख कोटी रुपये म्हणजे 4.41 लाख कोटी डॉलर या पातळीवर गेले होते. असे असले तरी परदेशी संस्थागत गुंतवणूकदाराकडून विक्री चालूच असून काल या गुंतवणूकदारांनी 4,788 कोटी रुपयांच्या शेअरची विक्री केली.
