Stock Market: भारतीय शेअर बाजाराने आज सोमवारी जोरदार सुरुवात केली. बीएसई सेन्सेक्स ४४२.६१ अंकांनी (०.५४%) वाढून ८२,२००.३४ वर बंद झाला, तर निफ्टी १२२.३० अंकांनी (०.४९%) उसळी घेत २५,०९०.७० वर पोहोचला. बँकिंग शेअर्समधील खरेदीमुळे बाजारात उत्साह दिसून आला. एचडीएफसी बँक आणि आयसीआयसीआय बँकेच्या शेअर्सनी बाजाराला मजबूत आधार दिला. मात्र, टॅरिफच्या चिंतेमुळे ही वाढ मर्यादित राहिली.

सेक्टोरल निर्देशांकांमध्ये निफ्टी प्रायव्हेट बँक १.०५% आणि निफ्टी बँक ०.९८% वाढले. निफ्टी मेटल (०.९४%), निफ्टी ऑटो (०.४४%) आणि निफ्टी मिडकॅप १०० (०.४६%) यांनीही चांगली कामगिरी केली. दुसरीकडे, ऑइल अँड गॅस, एफएमसीजी आणि पीएसयू बँक शेअर्समध्ये विक्रीचा दबाव दिसला.

बीएसईवरील कंपन्यांचे एकूण बाजार भांडवल ४५८.३७ लाख कोटींवरून ४६० लाख कोटींवर पोहोचले, ज्यामुळे गुंतवणूकदारांच्या संपत्तीत १.६३ लाख कोटींची वाढ झाली. सेन्सेक्समधील ३० पैकी १८ शेअर्स तेजीत बंद झाले. इटर्नलच्या शेअर्समध्ये ५.३८% वाढ सर्वाधिक राहिली, तर आयसीआयसीआय बँक, एचडीएफसी बँक, महिंद्रा अँड महिंद्रा आणि भारत इलेक्ट्रॉनिक्स १.३७% ते २.७६% वाढले. रिलायन्स इंडस्ट्रीज ३.२९% घसरणीसह सर्वात मोठा तोट्यात राहिला. एकूण ४,३२७ शेअर्सपैकी १,९६४ तेजीत, तर २,१८६ घसरणीत बंद झाले.