Stock Market: अमेरिका- इराण युद्ध एक आठवड्यापासून चालू आहे. परिस्थितीत सरलेल्या आठवड्यात भारतीय शेअर बाजाराचे निर्देशांक तीन टक्क्यांनी कोसळले. जर युद्ध थांबले नाही तर आगामी काळातही भारतीय शेअर बाजाराच्या निर्देशांकावर नकारात्मक परिणाम होण्याची शक्यता विश्लेषकांनी व्यक्त केली. आठवड्याच्या पातळीवर सरलेल्या आठवड्यात मुंबई शेअर बाजाराचा निर्देशांक सेन्सेक्स 2,368 अंकांनी म्हणजे 2.91 टक्क्यांनी कोसळून 78,918 अंकावर बंद झाला. या आठवड्यात विस्तारित पाया असलेल्या राष्ट्रीय शेअर बाजाराचा निर्देशांक निफ्टी 728 अंकांनी म्हणजे 2.89 टक्क्यांनी कोसळून 24,450 अंकावर बंद झाला. या आठवड्यात फक्त भारतीय शेअर बाजाराचेच नुकसान झाले नाही तर अमेरिकेतील शेअर बाजाराचे निर्देशांक कोसळले. त्यानंतर युरोप आणि चीन वगळता आशिया खंडातील इतर शेअर बाजाराचे निर्देशांक कमी झाले. त्याचा भारतीय शेअर बाजारातील गुंतवणूकदारांच्या मानसिकतेवर परिणाम झाला. दक्षिण कोरियातील शेअर बाजाराचे निर्देशांक या आठवड्यात सर्वात जास्त कोसळले. युद्धामुळे खनिज तेलाचे दर वाढले आहेत. भारत आपल्या गरजेच्या 85% खनिज तेल आयात करतो. त्यामुळे भारताला खनिज तेल महागात पडणार आहे. परकीय चलन वापरले जाणार असल्यामुळे रुपयाचे अवमूल्यन होणार आहे. अशा परिस्थितीत भारतातील महागाई वाढून त्याचा इतर क्षेत्रावर परिणाम होण्याची शक्यता आहे. रुपया घसरल्यानंतर परदेशी गुंतवणूकदारांना कमी परतावा मिळतो. त्यामुळे अगोदरच विक्री करीत असलेल्या परदेशी गुंतवणूकदारांनी विक्री आणखी वाढविल्यामुळे निर्देशांकावर त्याचा जास्त परिणाम झाला. संरक्षण आणि ग्राहक वस्तू क्षेत्र वगळता इतर सर्वच क्षेत्राच्या निर्देशांकावर याचा नकारात्मक परिणाम झाला असे जिओजित वित्तीय सेवा या संस्थेचे विश्लेषक विनोद नायर यांनी सांगितले. ते म्हणाले की, या घडामोडीचा इतर देशावरही भारताइतकाच परिणाम होणार आहे. विशेषतः मध्यपूर्वेच्या लगत असलेल्या देशावर या घडामोडीचा जास्त परिणाम होणार आहे. त्यामुळे याचा संबंध जागतिक विकासदराशीही येऊ शकतो. अशा परिस्थितीत युद्ध थांबले जावे यासाठी जागतिक पातळीवर सामूहिक प्रयत्न वाढले असल्याचे दिसून येते.
