मुंबई – रिझर्व्ह बॅंकेचे पतधोरण बुधवारी जाहीर होणार असतानाच गुंतवणूकदारांकडून विक्री चालू असल्यामुळे सलग दुसऱ्या दिवशी शेअर बाजार निर्देशांकांत घसरण झाली. बाजार बंद होताना मुंबई शेअर बाजाराचा निर्देशांक सेन्सेक्‍स 567 अंकांनी कमी होऊन 55,107 अंकांवर बंद झाला. विस्तारित पाया असलेल्या राष्ट्रीय शेअर बाजाराचा निर्देशांक निफ्टी 153 अंकांनी म्हणजे 0.92 टक्‍क्‍यांनी कमी होऊन 16,416 अंकांवर बंद झाला. जागतिक शेअर बाजारांतही विक्रीचे वातावरण होते.

टायटन, डॉक्‍टर रेड्डीज, लार्सन अँड टुब्रो, हिंदुस्तान युनिलिव्हर, एशियन पेंटस्‌, बजाज फायनान्स, टीसीएस, नेस्ले या कंपन्यांच्या शेअरच्या भावात घट झाली तर एनटीपीसी, मारुती, महिंद्रा, भारती एअरटेल या कंपन्यांच्या शेअरच्या भावात थोडीफार वाढ होऊ शकली.

1261 कंपन्यांच्या शेअरचे भाव वाढले तर 1954 कंपन्यांच्या शेअरच्या भावात घट झाली. 126 कंपन्यांच्या शेअरचे भाव स्थिर राहिले. माहिती-तंत्रज्ञान, भांडवली वस्तू या क्षेत्राचे निर्देशांक 1 टक्‍क्‍यापर्यंत कमी झाले तर तेल आणि नैसर्गिक वायू, ऊर्जा क्षेत्राचे निर्देशांक वाढले. स्मॉल कॅप आणि मिड कॅपमध्ये अर्धा टक्‍क्‍यांची घट झाली. जीओजी वित्तीय सेवा या संस्थेचे विश्‍लेषक विनोद नायर यांनी सांगितले की, रेपो आणि रोख राखीव प्रमाणात अर्ध्या टक्‍क्‍याची वाढ गुंतवणूकदारांनी गृहीत धरली आहे. मात्र त्यापेक्षा मोठी वाढ केल्यानंतर त्याचा शेअर बाजाराच्या निर्देशांकावर परिणाम होऊ शकतो.

काल अमेरिकेच्या निर्देशांकत थोडीफार वाढ झाली होती. मात्र आज युरोप,जपान, दक्षिण कोरिया आणि जपानमधील शेअरच्या भावात घट झाल्यानंतर गुंतवणूकदारांनी विक्री केली. दरम्यान परदेशी संस्थागत गुंतवणूकदारांकडून विक्री चालूच असून काल या गुंतवणूकदारांनी 2,397 कोटी रुपयांच्या शेअरची विक्री केली असल्याची आकडेवारी शेअर बाजारानी जारी केली.

गुंतवणूकदारांचे लक्ष रिझर्व बॅंकेच्या पतधोरणाकडे लक्ष आहे. सध्या देशातील गुंतवणूकदार फारशी विक्री करत नाहीत. सध्या निर्देशांकामध्ये जी घट होत आहे ती मुख्यत: परदेशी संस्थागत गुंतवणूकदारांनी केलेल्या विक्रीमुळे होत असल्याचे त्यांनी सांगितले. रिझर्व बॅंकेने संतुलित पतधोरण जाहीर केले तर शेअर बाजारातील गळती थांबविण्यास मदत होईल.