Stock Market: युद्ध थांबण्याच्या शक्यतेबाबत संभ्रमाचे वातावरण निर्माण झाले आहे. इराण आणि अमेरिका परस्पराविरोधात संघर्ष चालू ठेवण्याच्या घोषणा करीत आहेत. यामुळे पुन्हा खनिज तेलाचे दर वाढले. अशा परिस्थितीत जागतिक महागाई वाढण्याचा धोका संभवतो. यामुळे बुधवारी शेअर बाजाराचे निर्देशांक दोन टक्क्यानी कोसळले मंगळवारी युद्ध थांबण्याच्या शक्यतेमुळे निर्देशांकात काही प्रमाणात वाढ झाली होती. बुधवारी मुंबई शेअर बाजाराचा निर्देशांक सेन्सेक्स 1,342 अंकांनी म्हणजे 1.72 टक्क्यांनी कोसळून 76,863 अंकावर बंद झाला. राष्ट्रीय शेअर बाजाराचा निर्देशांक निफ्टी 394 अंकांनी म्हणजे 1.63 टक्क्यांनी कोसळून 23,866 अंकावर बंद झाला. रेलीगेअर ब्रोकिंग या कंपनीचे उपाध्यक्ष अजित मिश्रा यांनी सांगितले की, युद्ध लांबण्याच्या शक्यतेमुळे खनिज तेलाचे दर वाढत आहेत. त्यातच परदेशी संस्थागत गुंतवणूकदार विक्री वाढवीत आहेत. त्यामुळे शेअर बाजाराचे निर्देशांक जास्त कोसळले. सन फार्मा आणि एनटीपीसी या कंपन्या वगळता बजाज फायनान्स, अॅक्सिस बँक, बजाज फिन्सर्व, महिंद्रा, मारुती, ट्रेन्ट, एअरटेल या कंपन्यांनी सपाटून मार खाल्ला. ऊर्जा, आरोग्य, युटिलिटीज, तेल आणि नैसर्गिक वायू, वीज क्षेत्र वगळता इतर क्षेत्राचे निर्देशांक कमी पातळीवर बंद झाले. काही ब्रोकर्सने सांगितले की, बर्याच गुंतवणूकदारांनी सध्याच्या परिस्थितीत नफा काढून घेणे पसंत केले. मात्र दीर्घपल याचा विचार करून गुंतवणूक करणारे गुंतवणूकदार खरेदी करीत आहेत. परदेशी संस्थागत गुंतवणूकदारांनी 4,672 कोटी रुपयांच्या शेअरची विक्री केली. देशातील संस्थागत गुंतवणूकदारांनी 6,333 कोटी रुपयांच्या शेअरची खरेदी केली. अमेरिका, युरोपातील शेअर बाजाराचे निर्देशांक घसरले होते. तर जपान, दक्षिण कोरिया, चीनमधील शेअर बाजारचे निर्देशांक मर्यादित प्रमाणात वाढले होते. क्षेत्र घट मिडकॅप 1.55% स्मॉल कॅप 0.61% वाहन 3.06% बँकेक्स 2.06% खासगी बँका 2.03% वित्तीय सेवा 1.99% ग्राहक वस्तू 1.89% सरकारी बँका 1.87%
