Stock Market: भारतीय शेअर बाजारात मंगळवारी (४ मार्च) मोठ्या प्रमाणात विक्रीचा मारा झाला. सेन्सेक्स १,१२२.६६ अंकांनी (१.४०%) घसरून ७९,११६.१९ च्या पातळीवर बंद झाला, तर निफ्टी ३८५.२० अंकांनी (१.५५%) खाली येत २४,४८०.५० वर स्थिरावला. विशेष म्हणजे, हे लागोपाठ तिसरे सत्र आहे ज्यात दोन्ही प्रमुख निर्देशांक तोट्यात बंद झाले आहेत. गुंतवणूकदारांना मोठा फटका – बीएसईवर सूचिबद्ध कंपन्यांचे एकूण बाजार भांडवल एका दिवसात ४५६.९० लाख कोटींवरून ४४६.८० लाख कोटी रुपयांवर घसरले. त्यामुळे गुंतवणूकदारांच्या संपत्तीत एकाच सत्रात सुमारे १० लाख कोटी रुपयांची घट झाली. सर्वच क्षेत्रांना फटका; आयटी अपवाद – पायाभूत सुविधा, सरकारी बँका, रिअल्टी, मीडिया, तेल व वायू, वाहन आणि धातू या क्षेत्रांमध्ये २ ते ४ टक्क्यांपर्यंत घसरण नोंदवली गेली. निफ्टी मिडकॅप आणि स्मॉलकॅप निर्देशांकही प्रत्येकी सुमारे २ टक्क्यांनी खाली आले. मात्र आयटी निर्देशांक जवळपास स्थिर राहिला हा एकमेव दिलासा होता. २७ शेअर तोट्यात; टाटा स्टीलची सर्वाधिक घसरण – stock market सेन्सेक्सच्या ३० पैकी तब्बल २७ शेअर लाल निशाणात बंद झाले. टाटा स्टील ६.७६ टक्क्यांसह सर्वाधिक घसरणारा शेअर ठरला. एनटीपीसी (४.५३%), अल्ट्राटेक सिमेंट, बजाज फायनान्स आणि लार्सन अँड टुब्रो (३.०७%) यांचाही मोठा तोटा झाला. याउलट भारती एअरटेल (१.७८%), टेक महिंद्रा आणि इन्फोसिस हे तीनच शेअर हिरव्या निशाणात राहिले. ७१९ शेअर्सनी गाठला ५२ आठवड्यांचा नीचांक – बीएसईवर एकूण ४,४३३ शेअर्समध्ये व्यवहार झाले. त्यापैकी ३,२३७ शेअर घसरणीसह, तर केवळ १,०५२ शेअर तेजीसह बंद झाले. दिवसभरात ७१९ शेअर्सनी ५२ आठवड्यांचा नवा नीचांक गाठला, तर केवळ ५३ शेअर्सनी नवा उच्चांक नोंदवला. घसरणीमागे आंतरराष्ट्रीय कारणे – अमेरिका-इस्रायल-इराण संघर्ष आणि कच्च्या तेलाच्या किमतींमधील तीव्र वाढ यामुळे जागतिक बाजारपेठांमध्ये अस्वस्थता निर्माण झाली असून, त्याचे थेट पडसाद भारतीय बाजारावर उमटत असल्याचे विश्लेषकांचे मत आहे.
