Stock Market: जागतिक बाजारातील अस्थिरता आणि भू-राजकीय तणावाच्या छायेतही भारतीय शेअर बाजाराने शुक्रवारी २० फेब्रुवारी रोजी दमदार पुनरागमन केले. सकाळच्या सत्रात विक्रीचा दबाव असतानाही, दुपारनंतर गुंतवणूकदारांनी दाखवलेल्या खरेदीच्या जोरामुळे बाजार सलग तिसऱ्या दिवशी हिरव्या निशाण्यावर बंद झाला. बाजार भांडवल ४६६.९५ लाख कोटींवर – दिवसभराच्या चढ-उतारानंतर मुंबई शेअर बाजारचा निर्देशांक ‘सेन्सेक्स’ ३१६.५७ अंकांच्या म्हणजेच ०.३८ टक्क्यांच्या वाढीसह ८२,८१४.७१ वर स्थिरावला. दुसरीकडे, राष्ट्रीय शेअर बाजारचा ‘निफ्टी’ सुद्धा ११६.९० अंकांनी वधारून २५,५७१.२५ च्या पातळीवर बंद झाला. या तेजीमुळे अवघ्या एका दिवसात गुंतवणूकदारांच्या संपत्तीत १.७३ लाख कोटी रुपयांची भर पडली असून, बीएसईवरील कंपन्यांचे एकूण बाजार भांडवल ४६६.९५ लाख कोटी रुपयांवर पोहोचले आहे. stock market शुक्रवारच्या व्यवहाराची सुरुवात अत्यंत सुस्त आणि दबावाखाली झाली होती. अमेरिका आणि इराणमधील वाढता तणाव, आंतरराष्ट्रीय बाजारपेठेत कच्च्या तेलाच्या किमतीत झालेली वाढ आणि आयटी क्षेत्रातील दिग्गज कंपन्यांच्या शेअर्समध्ये झालेली घसरण यामुळे गुंतवणूकदारांमध्ये भीतीचे वातावरण होते. मात्र, सत्राच्या उत्तरार्धात बँकिंग, धातू (मेटल) आणि ऊर्जा (पॉवर) क्षेत्रातील शेअर्समध्ये मोठ्या प्रमाणात खरेदी झाली. यामुळे निफ्टीने व्यवहारादरम्यान २५,६६३.५५ चा उच्चांक गाठला. जरी शेवटच्या तासात काही प्रमाणात नफावसुली झाली असली, तरी बाजार आपली मजबूती टिकवून ठेवण्यात यशस्वी ठरला. सेन्सेक्समधील ३० पैकी २२ शेअर्स वाढीसह बंद – क्षेत्रनिहाय कामगिरीचा विचार करता, आज ऊर्जा, धातू आणि सार्वजनिक क्षेत्रातील बँकांच्या निर्देशांकात १ ते २ टक्क्यांची वाढ दिसून आली. मिडकॅप इंडेक्समध्येही ०.५ टक्क्यांची सुधारणा झाली. मात्र, आयटी आणि मीडिया क्षेत्रातील शेअर्समध्ये आज विक्रीचा कल राहिला. सेन्सेक्समधील ३० पैकी २२ शेअर्स वाढीसह बंद झाले. यामध्ये एनटीपीसीच्या शेअरने २.७३ टक्क्यांची सर्वाधिक झेप घेतली. त्यापाठोपाठ लार्सन अँड टुब्रो, हिंदुस्थान युनिलिव्हर, बजाज फायनान्स आणि पॉवरग्रिड यांसारख्या कंपन्यांचे शेअर्स १.४४ ते २.३७ टक्क्यांच्या वाढीसह टॉप गेनर्स ठरले. दुसरीकडे, टेक महिंद्राचा शेअर १.७५ टक्क्यांनी घसरून टॉप लूझर ठरला. याशिवाय इन्फोसिस, इटरनल, एचसीएल टेक आणि भारती एअरटेल या कंपन्यांच्या शेअर्समध्येही ०.७६ ते १.२३ टक्क्यांपर्यंत घसरण नोंदवण्यात आली. मुंबई शेअर बाजारात आज एकूण ४,३४९ शेअर्समध्ये व्यवहार झाले, ज्यामध्ये १,९१७ शेअर्स वधारले तर २,२६५ शेअर्समध्ये घट झाली. विशेष म्हणजे आजच्या व्यवहारात ८२ शेअर्सनी ५२ आठवड्यांचा उच्चांक गाठला, तर २०४ शेअर्स त्यांच्या ५२ आठवड्यांच्या नीचांकी पातळीवर पोहोचले. एकंदरीत, जागतिक आव्हाने असूनही भारतीय बाजारपेठेने या आठवड्याचा शेवट सकारात्मक पद्धतीने केला आहे.
