Misal Pav: महाराष्ट्रात मिसळ म्हटलं की अनेकांच्या तोंडाला पाणी सुटतं. मटकीची गरमागरम उसळ, झणझणीत तर्री, कुरकुरीत फरसाण, बारीक चिरलेला कांदा आणि सोबत मऊ पाव… हा बेत म्हणजे खवय्यांसाठी पर्वणीच! नाश्त्यासाठी किंवा सुट्टीच्या दिवशी काहीतरी खास बनवायचं असेल, तर गावरान स्टाईल मिसळ हा उत्तम पर्याय आहे. विशेष म्हणजे, ही मिसळ बनवण्यासाठी बाहेर जाण्याची गरज नाही. घरच्या घरी उपलब्ध साहित्य वापरून तुम्ही चविष्ट आणि झणझणीत मिसळ तयार करू शकता. चला तर मग, जाणून घेऊया मिसळ बनवण्याची सोपी रेसिपी.

मिसळ बनवण्यासाठी लागणारं साहित्य

उसळीसाठी साहित्य :
– २ वाट्या मटकी
– १ कांदा
– १ टोमॅटो
– २ ते ३ हिरव्या मिरच्या
– लसूण पाकळ्या
– अर्धा चमचा मोहरी
– अर्धा चमचा जिरे
– चिमूटभर हिंग
– अर्धा चमचा हळद
– चवीनुसार मीठ
– २ चमचे तेल
– आवश्यकतेनुसार पाणी

झणझणीत कटासाठी साहित्य :
– १ कांदा
– ५ ते ६ लसूण पाकळ्या
– २ चमचे लाल तिखट
– १ चमचा मिसळ मसाला
– अर्धा चमचा गरम मसाला
– चिमूटभर हिंग
– चवीनुसार मीठ
– २ ते ३ चमचे तेल
– २ वाट्या पाणी

मिसळ सजवण्यासाठी :
– कुरकुरीत फरसाण
– बारीक चिरलेला कांदा
– चिरलेली कोथिंबीर
– लिंबाच्या फोडी
– पाव

कृती : अशी बनवा चविष्ट मटकीची उसळ

१. मटकीला आणा मोड

सर्वप्रथम मटकी स्वच्छ धुऊन साधारण ८ तास पाण्यात भिजत ठेवा. त्यानंतर पाणी काढून मटकीला मोड आणा. मोड आलेली मटकी कुकरमध्ये घाला. त्यात हळद, मीठ आणि आवश्यकतेनुसार पाणी घालून मटकी व्यवस्थित शिजवून घ्या.

२. तयार करा मसालेदार उसळ

एका कढईत तेल गरम करून त्यात मोहरी, जिरे आणि हिंगाची फोडणी द्या. त्यानंतर ठेचलेला लसूण आणि हिरव्या मिरच्या घालून परतून घ्या. आता बारीक चिरलेला कांदा घालून तो सोनेरी होईपर्यंत परता. कांदा परतल्यानंतर त्यात चिरलेला टोमॅटो, हळद, मिसळ मसाला आणि चवीनुसार मीठ घाला. टोमॅटो मऊ झाल्यावर शिजवलेली मटकी त्यात मिसळा. आवश्यकतेनुसार थोडं पाणी घालून उसळ काही मिनिटं चांगली उकळू द्या. अशा प्रकारे मिसळीसाठी चविष्ट उसळ तयार होईल.

३. कट बनवण्याची सोपी पद्धत

मिसळीची खरी चव तिच्या झणझणीत कटमध्ये असते. यासाठी कढईत तेल गरम करा. त्यात बारीक चिरलेला कांदा आणि लसूण घालून परता. कांदा मऊ झाल्यावर त्यात लाल तिखट, मिसळ मसाला, गरम मसाला, हिंग आणि मीठ घाला.

हे मिश्रण व्यवस्थित परतून घ्या. त्यानंतर दोन वाट्या पाणी घालून कट चांगला उकळू द्या. मसाल्यांचा स्वाद पाण्यात उतरला की झणझणीत कट तयार होईल. तिखटाचं प्रमाण आपल्या आवडीनुसार कमी-जास्त करू शकता.

४. शेवटी करा मिसळ तयार

आता एका खोल बाऊलमध्ये गरमागरम मटकीची उसळ घाला. त्यावर भरपूर कुरकुरीत फरसाण पसरवा. त्यानंतर तयार केलेला झणझणीत कट ओता. वरून बारीक चिरलेला कांदा आणि कोथिंबीर घालून सजवा. मिसळीसोबत लिंबाची फोड आणि गरम पाव द्यायला विसरू नका. खाण्यापूर्वी मिसळीवर लिंबाचा रस पिळा आणि पाव कटमध्ये बुडवून खाण्याचा आनंद घ्या.

खास टिप :

फरसाण कुरकुरीत राहण्यासाठी ते मिसळ वाढतानाच घाला. तसेच कट आणि उसळ वेगवेगळे ठेवल्यास प्रत्येकाला आपल्या आवडीनुसार तिखटपणा आणि रसाचं प्रमाण ठरवता येईल. अशा प्रकारे घरच्या घरी तयार करा झणझणीत, चविष्ट आणि अस्सल गावरान स्टाईल मिसळ. रविवारच्या नाश्त्याला किंवा पाहुण्यांसाठी हा बेत नक्की करून पाहा!