Prakash Raj : अभिनेते प्रकाश राज नेहमीच सामाजिक आणि राजकीय विषयांवर निर्भीडपणे आपली भूमिका मांडतात. आपल्या स्पष्टवक्तेपणामुळे त्यांना अनेकदा टीकेचा सामना करावा लागतो. एवढेच नव्हे, तर त्यांच्या राजकीय भूमिकांचा परिणाम त्यांच्या खाजगी आयुष्यावर देखील झाला आहे. मात्र, कोणत्याही दबावापुढे न झुकता त्यांनी आपली मते ठामपणे मांडली आहेत. त्यांच्या भूमिकांमागे त्यांची पत्नी प्रसिद्ध नृत्यदिग्दर्शिका पोनी वर्मा यांचाही मोलाचा वाटा राहिला आहे.

नुकत्याच दिलेल्या एका मुलाखतीत पोनी यांनी प्रकाश राज यांनी घेतलेल्या भूमिकांमुळे त्यांना अनेक कामं गमवावी लागली असल्याचा खुलासा केला. मुलाखतीत पोनी वर्मा यांना विचारण्यात आले की, प्रकाश राज यांच्या राजकीय विधानांमुळे होणाऱ्या टीकेच्या पार्श्वभूमीवर त्यांनी कधी पतीला आपली मते मवाळ करण्याचा सल्ला दिला होता का?

पोनी म्हणाल्या की, “सुरुवातीला प्रकाश यांच्या भूमिकेची भीती वाटत होती. गौरी लंकेश यांच्या हत्येची बातमी समजल्यानंतर प्रकाश यांना पूर्णपणे खचलेले पाहिले होते. गौरी यांच्या मृत्यूमुळे त्यांना प्रचंड मानसिक धक्का बसला होता. प्रकाश राज यांनी गौरी यांना यापूर्वीही धोक्याची जाणीव करून दिली होती. या घटनेनंतर त्यांनी अन्यायाविरोधात आवाज उठवण्याचा निर्धार कायम ठेवला.”

काम गमावले, पण तत्त्वांशी तडजोड केली नाही!

या मुलाखतीत पोनी वर्मा यांनी प्रकाश राज यांना त्यांच्या स्पष्टवक्तेपणामुळे चित्रपटसृष्टीत कोणत्या अडचणींचा सामना करावा लागला, याबद्दलही भाष्य केले. प्रकाश राज यांच्या भूमिकांमुळे काही कलाकार आणि इंडस्ट्रीतील लोक त्यांच्याविरोधात गेले. परिणामी, त्यांच्याकडील काही चित्रपट काढून घेण्यात आले.

पोनी म्हणाल्या की, “अनेक कलाकारांना आपली प्रतिमा आणि काम टिकवून ठेवण्याची चिंता असते. मात्र, प्रकाश यांना आपलं काम गमावण्याची भीती असली तरी चुकीच्या गोष्टींविरोधात बोलणं त्यांनी कधीही सोडलं नाही. आपली सद्सद्विवेकबुद्धी जे चुकीचं ठरवते, त्याला आपण पाठिंबा देऊ शकत नाही, अशी त्यांची ठाम भूमिका आहे.”

गौरी लंकेश आणि प्रकाश राज यांची ३५ वर्षांहून अधिक काळ मैत्री

पत्रकार गौरी लंकेश आणि प्रकाश राज यांच्यात अतूट मैत्रीचे नाते होते. दोघांची मैत्री तब्बल ३५ वर्षांहून अधिक काळ होती. ५ सप्टेंबर २०१७ रोजी बंगळूरुमधील राहत्या घराबाहेर गौरी लंकेश यांची गोळ्या झाडून हत्या करण्यात आली. गौरी यांच्या हत्येनंतर प्रकाश राज यांना मोठा धक्का बसला होता. त्यांनी यावर ठाम भूमिका घेतली होती. आजही सामाजिक आणि राजकीय प्रश्नांवर ते बेधडकपणे आपले मत मांडतात. त्यासाठी व्यावसायिक नुकसान सहन करावे लागले, तरी आपल्या तत्त्वांशी तडजोड करत नाहीत.

Sahab Singh Saini : आगामी निवडणुकीच्या काळातच भाजपला मोठा झटका! माजी मंत्री साथ सोडणार, ‘या’ पक्षाचं बळ वाढलं….