South Korean President arrested: दक्षिण कोरियाचे राष्ट्रपती यून सुक येओल यांना अटक करण्यात आली आहे. काही दिवसांपूर्वी यून सुक येओल यांनी देशात मार्शल लॉ लागू करण्याची घोषणा केली होती. त्यानंतर त्यांच्याविरोधात महाभियोग चालवण्यासाठीही मंजूरी मिळाली होती. अखेर मार्शल लॉ प्रकरणात दक्षिण कोरियाच्या अधिकाऱ्यांनी त्यांना अटक केली आहे.

लाचलुचपत प्रतिबंधक विभागाच्या मुख्यालयात नेण्यापूर्वी यून यांनी व्हीडिओच्या माध्यमातून नागरिकांशी संवाद साधला. या देशात कायद्याचे राज्य पूर्णपणे कोलमडले आहे. हा बेकायदेशीर तपास आहे. हिंसा होऊ नये म्हणून मी हा निर्णय घेतला असल्याचे यावेळी ते म्हणाले.

यून यांना ताब्यात घेण्यासाठी जवळपास 3,000 हून अधिक पोलिस अधिकारी आणि लाचलुचपत प्रतिबंधक तपास अधिकारी त्यांच्या निवासस्थानाजवळ जमा झाले होते. यावेळी यून यांचे समर्थक आणि सत्ताधारी पार्टीचे सदस्य सुरक्षा दलांशी भिडले. त्याआधी त्यांच्याविरोधात आंदोलन देखील करण्यात आले होते.

या महिन्याच्या सुरुवातीलाच न्यायालयाकडून राष्ट्रपती यून सुक येओल यांना ताब्यात घेण्यासाठीच्या वॉरंटला मंजूरी देण्यात आली होती. त्यांना तीनदा समन्स देखील बजावण्यात आले होते. मात्र,त्यांनी कोणतेही उत्तर दिले नव्हते. अखेर त्यांना अटक करण्यात आली. यून यांना ४८ तासांपर्यंत ताब्यात ठेवले जाऊ शकते. त्यांना पुढेही कोठडीत ठेवण्यासाठी आणखी एका अटक वॉरंटसाठी अर्ज करावा लागेल. ते देशाच्या इतिहासात अटक झालेले पहिलेच विद्यमान राष्ट्रपती ठरले आहेत.

दरम्यान, यून यांनी 3 डिसेंबरला अचानक दक्षिण कोरियात मार्शल लॉ लागू करण्याची घोषणा केली होती. दक्षिण कोरिया सारख्या लोकशाही देशात अचानक अशी घोषणा करण्यात आल्याने जगभरात आश्चर्य व्यक्त करण्यात आले होते. मात्र, मोठ्या प्रमाणात विरोध झाल्यानंतर अवघ्या काही तासांमध्येच त्यांना निर्णय मागे घ्यावा लागला होता. त्यानंतर त्यांच्याविरोधात महाभियोग चालवण्याच्या प्रस्तावालाही मंजूरी मिळाली होती.