सेऊल  – दक्षिण कोरियामध्ये अध्यक्षपदासाठी ३ जून रोजी मुदतपूर्व निवडणूक होणार आहेत. महाभियोगाद्वारे बडतर्फ करण्यात आलेले माजी अध्यक्ष यून सुक येओल यांच्या जागेवर नवीन अध्यक्षांची निवड करण्यासाठी ही निवडणूक होणार आहे. देशाचे प्रभारी अध्यक्ष हान डक-सू यांनी आज ही घोषणा केली.

यून सुक येओल यांच्यावरील महाभियोगाच्या खटल्याचा निकाल काही दिवसांपुर्वीच जाहीर झाला. गेल्या वर्षी डिसेंबरमध्ये यून यांनी मार्शल लॉ लागू करून राज्यघटनेचे उल्लंघन केल्याचा ठपका ठेवून घटनापीठाने यून यांच्या बडतज्ञफीवर शिक्कामोर्तब केले होते. दक्षिण कोरियातल्या कायद्यानुसार यून यांना बडतर्फ केल्याच्या ६० दिवसांच्या आत नवीन अध्यक्षांची निवड होणे अनिवार्य आहे.

अध्यक्षपदाच्या या मुदतपूर्व निवडणुकीत दक्षिण कोरियातल्या परस्पर भिन्न मतप्रवाह असलेल्या दोन राजकीय पक्षांची रस्सीखेच बघायला मिळणार आहे. यून यांच्या मार्शल लॉ नाट्यानंतर राजसत्तेवरील जनतेचा विश्‍वास कायम राखणे आणि अंतर्ग भेद दूर करण्याचे आव्हान दोन्ही पक्षांपुढे असणार आहे.

या निवडणुकीसाठी दोन्ही पक्षांना आपले उमेदवार निश्‍चित करावे लागतील. त्यासाठी पक्षांतर्गत प्राथमिक निडणूक घ्यावी लागणार आहे. डेमोक्रॅटिक पक्षाकडून ली यांना उमेदवारी मिळण्याची शक्यता अधिक आहे. ली यांना २०२२च्या निवडणुकीत यून यांच्याकडून अल्पसा फरकाने पराभव स्वीकारावा लागला होता. तर पीपल्स पॉवर पार्टीकडून कामगार मंत्री किम मून सू हे मुख्य दावेदार असण्याची शक्यता आहे. याशिवाय अन्य ४-५ नेते उमेदवारी मिळवण्यासाठी प्रयत्नशील असतील.