जामखेड प्रतिनिधी: जामखेड तालुक्यातील सध्याच्या बिकट रस्ते आणि खोळंबलेल्या विकासकामांच्या पार्श्वभूमीवर सोशल मीडियावर ‘एक जामखेडकराची साद…’ ही मोहीम तुफान व्हायरल होत आहे.

तालुक्यातील विविध व्हॉट्सॲप ग्रुप्स आणि सोशल मीडिया प्लॅटफॉर्मवर स्थानिक नागरिकांकडून एक भावूक आणि वास्तववादी पोस्ट मोठ्या प्रमाणात शेअर केली जात असून, यामध्ये आमदार रोहित पवार यांच्या व्हिजनशील नेतृत्वाचे आणि काम करण्याच्या प्रामाणिक इच्छेचे महत्त्व पुन्हा एकदा अधोरेखित झाले आहे.
नागरिकांची भावूक हाक: “दादा, तुम्हीच आमची काळजी घ्या…”

व्हायरल झालेल्या या पोस्टमध्ये जामखेडच्या जनतेच्या वेदना आणि मनातील पश्चात्ताप स्पष्टपणे दिसून येत आहे. पोस्टमध्ये खालील प्रमुख मुद्द्यांवर रोखठोक भाष्य करण्यात आले आहे:

“आपला… आपला… म्हणता म्हणता आम्ही फसलो,” असे म्हणत स्थानिक राजकीय स्वार्थापोटी रस्त्यांच्या कामात अडथळे आणले गेले आणि कामे थांबवली गेली, असा थेट आरोप यामध्ये करण्यात आला आहे. जामखेड शहरातील रस्त्यांची झालेली दुर्दशा, प्रत्येक वेळी चिखल आणि खड्ड्यांतून करावा लागणारा प्रवास यांमुळे नागरिक त्रस्त झाले आहेत.अडचणींच्या काळात सामान्यांचे प्रश्न सोडवण्याऐवजी काही मंडळी स्वतःच्या स्वार्थासाठी आणि बँकेच्या राजकारणात व्यस्त राहिली, अशी खंत व्यक्त करण्यात आली आहे.

“आईविना मुलगा पोरका होतो, तसा जामखेड तालुका विकासापासून पोरका होत आहे,” अशा अत्यंत हृदयस्पर्शी ओळींतून तालुक्याची सद्यस्थिती मांडली गेली आहे.

आमदार रोहित पवार यांनी जामखेडच्या विकासासाठी आखलेले व्हिजन, रस्त्यांचे जाळे मजबूत करण्याची त्यांची कामाची धडपड आणि तळागाळातील माणसाशी असलेले नाते आज जामखेडकरांना प्रकर्षाने आठवत असल्याचे या पोस्टमधून स्पष्ट होत आहे.

“माफ करा दादा… आम्ही चुकलो! आज आम्हाला तुमची किंमत समजली…” अशा शब्दांत नागरिक आपल्या भावना व्यक्त करत असून, जामखेडच्या विकासाची विस्कटलेली घडी पूर्ववत बसवण्यासाठी आमदार रोहित पवार यांच्याच दूरदृष्टीची अन् खंबीर नेतृत्वाची गरज असल्याचे मत आता सर्वसामान्यांमधून व्यक्त होत आहे.

ही मोहीम केवळ एका पोस्टपुरती मर्यादित न राहता, स्थानिक नागरिक आणि तरुणांकडून याला प्रचंड प्रतिसाद मिळत आहे. “दादा, मी एक जामखेडकर म्हणून साद घालत आहे… तुम्हीच आमची काळजी घ्या!” हा संदेश सध्या संपूर्ण तालुक्यात चर्चेचा केंद्रबिंदू ठरला आहे.