प्रभात वृत्तसेवा मंचर – मंचर नगरपंचायतीच्या चुरशीच्या झालेल्या निवडणुकीत शिवसेना पक्षाच्या वतीने नगराध्यक्षपदाच्या राजश्री दत्ता गांजाळे या सुमारे २१० मतांनी निवडून आल्या असून त्यांनी राष्ट्रवादी काँग्रेस पक्षाच्या उमेदवार मोनिका सुनील बाणखेले यांना पराभूत केले. एकंदर १७ जागांपैकी नगरसेवक म्हणून राष्ट्रवादी काँग्रेस पक्षाचे नऊ,शिवसेना पक्षाचे तीन,उद्धव ठाकरे पक्षाचे एक,शरदचंद्र पवार पक्षाचे एक आणि अपक्ष तीन उमेदवार निवडून आले आहे. विशेष म्हणजे नगराध्यक्षपदासाठी शिवसेना पक्षाच्या राजश्री गांजाळे निवडून आल्या असल्या तरी त्यांचे पती दत्ता गांजाळे हे मात्र नगरसेवक पदासाठी पराभूत झाले आहे. त्यामुळे गड आला पण सिंह गेला अशी अवस्था शिवसेना शिंदे पक्षाची झाली आहे. तर राष्ट्रवादी काँग्रेस पक्षाचे नगरसेवक नऊ निवडून आले असून नगराध्यक्ष पद गेल्यामुळे त्यांच्यामध्ये कही खुशी कही गम अशी अवस्था झाली आहे. शिवसेनेच्या नगराध्यक्ष पदाच्या विजयी उमेदवार राजश्री दत्तात्रय गांजाळे ४१३५ मते, पराभूत उमेदवार मोनिका सुनील बाणखेले ३९२५ मते राष्ट्रवादी पक्ष,प्राची आकाश थोरात ३२२४ मते अपक्ष,रजनीगंधा राजाराम बाणखेले ७३८ मते उद्धव बाळासाहेब ठाकरे शिवसेना पक्ष, जागृती किरण महाजन ३०१ मते अपक्ष, फरजीन इकबाल मुलानी ३३३ मते कॉंग्रेस आय. संपूर्ण पॅनल असते तर … मंचर नगरपंचायतीच्या निवडणुकीत संपूर्ण पॅनेल उभे करता आले नाही संपूर्ण पॅनल उभे असते तर नगराध्यक्ष पदासह नगरसेवक देखील निवडून आले असते.अशी प्रतिक्रिया जनसेवक संजय थोरात यांनी व्यक्त केली. मंचर नगरपंचायतीच्या निवडणुकीत नगराध्यक्ष पदासाठी अपक्ष उमेदवार म्हणून माझी स्नुषा प्राची आकाश थोरात यांना ३२२४ मते मिळाली. लागलेला निकाल आम्हाला मान्य असून मंचरकरांनी दिलेला प्रतिसाद समाधानकारक आहे. कुठलाही पक्ष, नेते मागे नसताना सामान्य जनतेने जे मतदान केले आहे.ते आम्हाला मान्य असून त्या सर्व मतदारांचे आभार.पुढील काळात अजून जोमाने काम करू.जोपर्यंत विजय होत नाही तोपर्यंत लढत राहू संघटना, पक्षाने ताकद दिली असती तर आम्ही विजयी झालो असतो.जनतेच्या सेवेसाठी आम्ही सदैव तत्पर असून या पुढील काळात जनतेसाठीच काम करणार असल्याचे त्यांनी सांगितले. क्रॉस मतदान झाल्यामुळे फटका मंचर नगरपंचायत निवडणुकीत क्रॉस मतदान झाल्यामुळे याचा मोठा फटका नगराध्यक्षपदाच्या उमेदवाराला बसल्याची प्रतिक्रिया राष्ट्रवादी कॉंग्रेस पक्षाचे नेते सुरेश घुले यांनी व्यक्त केली. राष्ट्रवादी काँग्रेस पक्षाला अपयश आले असे म्हणता येणार नाही. नगराध्यक्ष पद जरी हातातून गेले असले तरी ९ नगरसेवक राष्ट्रवादी काँग्रेस पक्षाचे निवडून आले आहेत. क्रॉस मतदान झाल्यामुळे याचा मोठा फटका नगराध्यक्षपदाच्या उमेदवारास बसल्याचे दिसून येत असून भविष्यात जोरदारपणे राष्ट्रवादीची ताकद वाढवण्यासाठी मंचर शहरात प्रयत्न करणार असल्याचे त्यांनी सांगितले.
