नवी दिल्ली – शिवसेनेच्या विरोधापुढे लोटांगण घालत भारतीय जनता पक्षाने ईशान्य मुंबईचे खासदार किरीट सोमैय्या यांना डच्चू दिला. भाजपने मनोट कोटक यांना ईशान्य मुंबईतून मैदानात उतरविण्याचा निर्णय घेतला आहे.
केंद्रीय आरोग्य मंत्री आणि भाजपच्या केंद्रीय निवडणूक समितीचे सचिव जे. पी. नड्डा यांनी आज महाराष्ट्र आणि उत्तरप्रदेशातील सहा उमेदवारांची 16 वी यादी जाहीर केली. शिवसेनेचा कडाडून विरोध लक्षात घेता भाजपने ईशान्य मुंबईचे खासदार किरीट सोमैय्या यांना उमेदवारी नाकारली आहे. त्यांच्या जागी मनोज कोटक यांना मैदानात उतरविण्यात आले आहे.
भाजपने ईशान्य मुंबईचा उमेदवार वगळता महाराष्ट्रातील सर्व उमेदवारांची नावे जाहीर केली होती. यामुळे लोकांमध्ये उलटसुलट चर्चा रंगली होती. मुंबईतील नालेसफाई आणि रस्त्ये बांधणीत खूप मोठा भ्रष्टाचार झाला असल्याचा आरोप करीत सोमैय्या यांनी सेनेविरूध्द रान पेटविले होते. याच कारणामुळे सेनेने सोमैय्या यांच्या उमेदवारीला विरोध केला होता.