सोलापूर : सोलापूर जिल्ह्यातील पंढरपूरमधून एक धक्कादायक घटना समोर आली आहे. या ठिकाणी काही अज्ञातांनी एका कुटुंबाला जिवंत जाळण्याचा प्रयत्न केला आहे. हल्लेखोरांनी कुटुंब झोपेत असताना मध्यरात्री घरावर पेट्रोलचे पेट घेतलेले गोळे टाकून हे आख्खं कुटुंब संपवण्याचा प्रयत्न केला. या घटनेत कुटुंबातील ३ जण भाजले आहेत. त्यांच्यावर स्थानिक रुग्णालयात उपचार सुरु आहेत.

काय आहे संपूर्ण प्रकरण?
ही घटना पंढरपूर शहरातील इसबावी परिसरातील बसवेश्वर नगरामध्ये घडली आहे. या ठिकाणी कदम कुटुंब वास्तव्याला आहे. बुधवारी रात्री जेवण झाल्यानंतर हे कुटुंब झोपी गेलं होतं. सर्वजण गाढ झोपेत असताना मध्यरात्रीच्या सुमारास घरात अचानक पेट्रोलने पेट घेतलेले गोळे पडायला सुरुवात झाली. साखर झोपेत असलेल्या कुटुंबाला नक्की काय घडतंय, याचा काहीच थांगपत्ता नव्हता.

जेव्हा कुटुंबीयांचे डोळे उघडले तेव्हा त्यांच्या वाचण्याचे जवळपास सगळे मार्ग बंद झाले होते, घराने पेट घेतला होता. अनेक संसार उपयोगी वस्तू जळून खाक झाल्या होत्या. सुदैवाने यात कोणतीही जिवीतहानी झाली नाही. मात्र यामध्ये नागनाथ कदम, योगेश कदम आणि सुबोध कदम हे तिघेजण गंभीर भाजले. त्यानंतर तातडीने उपचारासाठी स्थानिक रुग्णालयात दाखल करण्यात आले.

कारण अद्याप अस्पष्ट
ही आग नेमकी कुणी आणि का लावली? हे मात्र अद्याप समजू शकलेले नाही. या घटनेची माहिती मिळताच पोलिसांनी घटनास्थळी धाव घेतली. पोलिसांनी घटनास्थळाचा पंचनामा केला असून आग लावणाऱ्यांचा शोध घेतला जात आहे. या घटनेमुळे मात्र परिसरात मोठी खळबळ उडाली आहे.