हडपसर -ससाणे नगर रस्त्यावर ड्रेनेज लाइन टाकण्यासाठी सिमेंट कॉंक्रिटीकरण केलेला चांगला रस्ता खोदण्यात आला आहे. खोदलेल्या रस्त्याचा अंदाज येत नसल्याने वाहने अडकून अपघात घडत आहेत. महापालिका प्रशासनाने येथील काम त्वरीत पूर्ण करून रस्ता पूर्ववत कराव अन्यथा शिवसेनेच्या वतीने महापालिका अधिकाऱ्यांच्या तोंडाला काळे फासण्यात येईल, असा इशारा शिवसेनेचे जिल्हा प्रमुख उल्हास तुपे यांनी दिला आहे. ससाणेनगर येथे काळे कॉलनी, काळूबाई मंदिरासमोर ड्रेनेजलाइन टाकण्याचे काम सुरू आहे. काम झालेल्या भागात केवळ माती-मुरूम टाकून ठेवण्यात आला आहे, त्याठिकाणी वाहनांची वर्दळ असते यातून खड्याचा अंदाज येत नसल्याने वाहने अडकून अपघात घडत आहेत. वाहन अडकून पडल्याने वाहतूक कोंडी होत आहे. खोदून अर्धवट ठेवलेल्या कामाच्या ठिकाणी कोणत्याही प्रकारची सूचना लावण्यात आलेली नाही, अशीच स्थिती मगरपट्टा रस्त्यावरही आहे. येथेही ड्रेनेजलाइनसाठी रस्ता खोदण्यात आला आहे. दोन्हीही ठिकाणी महापालिका प्रशासन निष्काळजीपणे काम करीत असल्याचे नागरिकांचे म्हणणे आहे. महापालिका प्रशासनकडून कामे रेंगाळत सुरू आहेत. रस्ता खोदलेल्या ठिकाणी डांबरी किंवा सिमेंट कॉक्रिटीकरण केले जात नाही. ससाणेनगर रस्ता आणि मगरपट्टा रस्ता याठिकाणी पालिका प्रशासनाची कृती किती लाजीरवाणी आहे. हेच लक्षात येते. दोन्ही ठिकाणी काम तत्काळ पूर्ण करावे. – उल्हास तुपे, जिल्हा प्रमुख-शिवसेना
