सिंगापूर : सिंगापूरचे पंतप्रधान लॉरेन्स वोंग यांच्या नेतृत्वाखालील सत्तारुढ पीपल्स ऍक्शन पार्टीला निवडणुकीमध्ये निर्विवाद बहुमत मिळाले आहे. आर्थिक अनिश्चिततेच्या काळात काल देशभरात मुदतपुर्व निवडणुकांसाठी मतदान झाले होते. रात्री उशिरा झालेल्या मतमोजणीमध्ये सिंगापूरच्या प्रतिनिधीगृहातील एकूण ९७ जागांपैकी ८७ जागा पीपल्स ऍक्शन पार्टीने जिंकल्या आहेत. पीएपीने एकूण मतांपैकी ६४ टक्के मते मिळवली. २०२० मध्ये झालेल्या निवडणुकीमध्ये पीएपीला ६१ टक्के मते मिळाली होती. त्यापेक्षा यंदा मिळालेल्या मतांची टक्केवारी अधिक आहे. सिंगापूरमधील सर्वात मजबूत विरोधी पक्षांपैकी एक असलेल्या वर्कर्स पार्टीने आपल्या १० संसदीय जागा राखण्यात यश मिळवले.निवडणुकांमधील या निकालांमुळे पंतप्रधान वोंग यांना संसदेतील निर्विवाद जनादेश मिळाला आहे. पंतप्रधान आणि पक्षाचे नेते म्हणून वोंग यांच्या नेतृत्वाखाली पीपल्स ऍक्शन पार्टीने लढवलेली ही पहिलीच निवडणूक होती. आपल्या सरकारवर दाखवलेला विश्वास स्थैर्य आणि आत्मविश्वासच सिंगापूरच्या जनतेने या निकालाद्वारे दाखवून दिला असल्याचे वोंग यांनी निकालानंतर माध्यमांशी बोलताना सांगितले. मावळत्या सरकारमधील सर्व खासदार निवडून आल्याबद्दल वोंग यांनी आनंद व्यक्त केला आहे. नवीन सरकारमधील मंत्रिमंडळ लवकरच जाहीर केले जाईल, असेही त्यांनी सांगितले. पीएपी हा पक्ष सिंगापूरच्या राजकारणातील सर्वात जूना पक्ष असून सिंगापूरला १९८५ मध्ये स्वातंत्र्य मिळाले, तेंव्हापासून हा पक्षाची सत्ता आहे. ली हसेन लूंग जवळपास दोन दशके पंतप्रधान राहिल्यानंतर गेल्यावर्षी मे महिन्यात पंतप्रधानपदावरून पायउतार झाले होते. त्यांचे उत्तराधिकारी म्हणून वोंग सिंगापूरचे पंतप्रधान झाले होते. सिंगापूरमधील वाढती महागाई आणि घरांच्या वाढणाऱ्या किंमतींच्या मुद्द्यावरून विरोधकांनी मोठे विरोधी अभियान सुरू केले होते. त्यामुळे वोंग यांनी मुदतपूर्व निवडणुका घेतल्या.
