बंगळुरू : कर्नाटकमधील कॉंग्रेस सरकारविरोधात अविश्वास ठराव आणला जाण्याची शक्यता वर्तवली जात आहे. त्या पार्श्वभूमीवर, मुख्यमंत्री सिद्धरामय्या यांनी विरोधकांना म्हणजे भाजप-जेडीएस युतीला चॅलेंज दिले. अविश्वास ठरावाला सामोरे जाण्याची सरकारची तयारी असल्याचे त्यांनी म्हटले. कर्नाटक कॉंग्रेसमध्ये नुकताच कथित सत्तासंघर्ष रंगला. सिद्धरामय्या आणि उपमुख्यमंत्री डी.के.शिवकुमार यांच्यात नेतृत्वावरून रस्सीखेच सुरू असल्याचे चित्र समोर आले. त्यातून राजकीय संभ्रम निर्माण झाल्याने विरोधकांनी सरकारविरोधात अविश्वास ठराव आणण्याचे संकेत दिले. मात्र, सिद्धरामय्या आणि शिवकुमार यांनी एकमेकांच्या निवासस्थानी जाऊन सत्तासंघर्षाच्या चर्चांना तूर्तास पूर्णविराम दिला. अशात कर्नाटक विधिमंडळाचे हिवाळी अधिवेशन सोमवारपासून सुरू होत आहे. त्यामुळे विरोधकांकडून अविश्वास ठराव आणला जाण्याच्या चर्चा जोर धरू लागल्या आहेत. अविश्वास ठराव आणण्याविषयी अद्याप कुठला निर्णय झाला नसल्याचे विरोधकांनी म्हटले आहे. तसे असले तरी त्यासंबंधीचा प्रश्न पत्रकारांनी सिद्धरामय्या यांना विचारला. विरोधकांनी कुठलाही ठराव आणूद्यात. सामोरे जाण्यास आम्ही तयार आहोत, असे उत्तर त्यांनी दिले. त्यावेळी शिवकुमार हेही त्यांच्यासमवेत होते. दोन्ही नेत्यांनी याआधीच ऐक्याची ग्वाही दिली आहे.
