India vs New Zealand 2nd Test : भारत आणि न्यूझीलंड यांच्यातील कसोटी मालिकेतील दुसरा सामना 24 ऑक्टोबरपासून पुण्यात खेळवला जाणार आहे. शुभमन गिल (Shubman Gill) या सामन्यासाठी टीम इंडियाच्या प्लेइंग इलेव्हनमध्ये सामील होऊ शकतो. गिल यांच्याबाबत एक सकारात्मक बातमी आहे. रिपोर्ट्सनुसार, तो पूर्णपणे फिट आहे. शुभमन कसोटी मालिकेतील पहिला सामना खेळू शकला नाही. या सामन्यात टीम इंडियाला पराभवाचा सामना करावा लागला होता. गिलच्या अनुपस्थितीत टीम इंडियाने सर्फराज खानला प्लेइंग इलेव्हनमध्ये स्थान दिले होते.

दुसऱ्या कसोटी सामन्यासाठी टीम इंडिया पुण्यात दाखल झाली आहे. संघाचे सहाय्यक प्रशिक्षक रायन डोशेट यांनी मंगळवारी शुभमन गिलवर प्रतिक्रिया व्यक्त केली. क्रिकइन्फोने दिलेल्या वृत्तानुसार, ते म्हणाले, “मला वाटते की, गिल पुणे कसोटीसाठी फिट असेल. सध्या त्याला थोडीशी समस्या आहे.”

दरम्यान, शुभमन कसोटी मालिकेतील पहिला सामना दुखापतीमुळे खेळू शकला नव्हता. आता दुखापतीतून सावरल्यानंतर तो प्लेइंग इलेव्हनमध्ये परतला तर तिसऱ्या क्रमांकावर फलंदाजी करू शकतो. शुभमन गिल प्लेइंग इलेव्हनमध्ये परतला तर केएल राहुलला ब्रेक दिला (वगळलं) जाऊ शकतो.

शेवटच्या कसोटी सामन्यात राहुल काही विशेष कामगिरी करू शकला नाही. राहुल पहिल्या डावात शून्य तर दुसऱ्या डावात 12 धावा काढून बाद झाला होता. सर्फराज खानही पहिल्या डावात शून्यावर बाद झाला होता पण त्याने दुसऱ्या डावात दमदार कामगिरी केली होती. त्याने दुसऱ्या डावात 150 धावा केल्या.  त्याबरोबरच ऋषभ पंतसोबतही 177 धावांची मोठी भागीदारी रचली होती. दुसरीकडे राहुल फ्लॉप ठरला होता त्यामुळे त्याला संघातून वगळलं जाऊ शकते.

IND vs NZ 2nd Test : ऋषभ पंत पुणे कसोटीत खेळणार की नाही? टीम इंडियाच्या सहाय्यक प्रशिक्षकानं दिली मोठी अपडेट…

ऋषभ पंतच्या दुखापतीबाबतही मिळाले अपडेट 

टीम इंडियाचे सहाय्यक प्रशिक्षक डोशेट यांनीही पंतच्या दुखापतीबाबत अपडेट दिली आहे. ते म्हणाले,  “पंत ठिक आहे आणि तो पुणे येथील कसोटी सामन्यात खेळू शकतो.” तसेच दुसऱ्या कसोटीसाठी टीम इंडिया पुण्यात पोहोचली असून रेवस्पोर्ट्ज (RevSportz) नुसार, ऋषभ पंतनेही मंगळवारी सराव केला आणि नेटमध्ये सराव करताना त्याने अनेक मोठे फटके मारले.