ठाणे : उद्धवसेनेच्या वर्धापनदिन मेळाव्यात बोलताना उद्धव ठाकरेंनी ‘कम ऑन किल मी’ असे म्हणताना विरोधकांना आव्हान दिले होते. लोकांच्या मदतीला धावणारी शिवसेना कॉर्पोरेट करायला गेले ही काही लोकांकडून चूक झाली. ती आम्ही सुधारली असून ‘कम ऑन…हेल्प मी’ अशी हाक आल्यास धावून जाणारे पहिले एकनाथ शिंदे असतात, असे प्रतिपादन शिवसेना खासदार डॉ. श्रीकांत शिंदे यांनी केले.

पहलगाम दहशदवादी हल्ल्यानंतर भारताने पाकिस्तानला ‘ऑपरेशन सिंदूर’च्या माध्यमातून प्रत्त्युत्तर दिले. त्यानंतर भारताने आंतरराष्ट्रीय स्तरावर दहशतवादा विरोधात आपली भूमिका मांडण्यासाठी विविध देशांत आपली शिष्टमंडळे पाठवली. यातील एका शिष्टमंडळात कल्याणचे खासदार डॉ. श्रीकांत शिंदे सहभागी होते. या दौऱ्याचा अनुभव कथन करण्यासाठी ठाण्यात डॉ. काशिनाथ घाणेकर नाट्यगृहातील सभागृहामध्ये ‘डिप्लोमसी बाय डॉक्टर’ या मुक्त चर्चेचे आयोजन करण्यात आले होते. ‘आम्ही नेहमी वाचविण्याचाच विचार करतो. चित्रपटातील संवाद अनेकजण वापरत आहेत, अशीही टीकाही शिंदे यांनी ठाकरे यांचे नाव न घेता केली. भारताचे प्रतिनिधित्व करण्याची आणि राष्ट्रप्रमुख, उपराष्ट्रपती, मंत्री, सिनेट यांच्यासमक्ष भारताची भूमिका मांडण्याचा दुर्मिळ योग माझ्या आयुष्यात या निमित्ताने आला, असल्याचे श्रीकांत शिंदे बोलताना म्हणाले.

पाकिस्तानचा बुरखा फाडायचा होता…
‘मी महाविद्यालयात असताना खासदार झालो. माझ्यातील विद्यार्थी आज ही तसाच आहे. मला अभ्यास करायला आवडतो. मी आजही विविध बाबींचा अभ्यास करत असतो. त्यानुसार भेट देणाऱ्या त्या देशांचा अभ्यास केला. राष्ट्रप्रमुखांसोबत बसून देशाची बाजू मांडली. लायबेरिया येथील राष्ट्रप्रमुखांनी मला सिनेटमध्ये बोलण्याची संधी दिली. अशी संधी मिळणे हे खूपच अभिमानास्पद असून या शिष्टमंडळाच्या माध्यमातून जगामध्ये जाऊन पाकिस्तानचा खरा चेहरा दाखवण्याची संधी आम्हाला मिळाली. पाकिस्तानचा बुरखा आम्हाला फाडायचा होता. ही संधी आम्हाला पंतप्रधान नरेंद्र मोदी यांच्यामुळे मिळाल्याचे खासदार शिंदे यांनी नमूद केले.