Shridatta Vidyalaya : रिगर्स युथ सायन्स रिसर्च फाउंडेशनच्या वतीने भारतीय विज्ञान संस्था (IISc) बेंगळुरू, भारतीय खगोलशास्त्र संस्था (IIA) आणि भारतीय अंतराळ संशोधन संस्था (ISRO) यांच्या संयुक्त विद्यमाने आयोजित करण्यात आलेल्या रमण स्पेस मंथन या अखिल भारतीय स्तरावरील विज्ञान परीक्षेत पिंपरखेड (ता. शिरूर, जिल्हा पुणे) येथील श्रीदत्त विद्यालयने (Shridatta Vidyalaya) उत्कृष्ट कामगिरी करून नावलौकिक मिळवले आहे. या परीक्षेत श्रीदत्त (Shridatta Vidyalaya) विद्यालयातील इयत्ता सातवीचा विद्यार्थी आर्यन सूर्यकांत चव्हाण याने सहावा क्रमांक मिळवून अप्रतिम यश संपादन केले आहे. संपूर्ण भारतातून सुमारे ७ लाख ६० हजारांहून अधिक विद्यार्थ्यांनी या परीक्षेसाठी नोंदणी केली होती. या स्पर्धेत वेस्टर्न झोन (महाराष्ट्र, गोवा आणि गुजरात) मधून केवळ ५० विद्यार्थ्यांची निवड झाली असून, त्यामध्ये आर्यन चव्हाण याने सहावा क्रमांक पटकावला आहे. परिणामी, त्याची झोन स्तरावरील अंतिम निवड झाली असून, त्याला पुढील स्तरासाठी संधी मिळाली आहे. झोन स्तरावर निवड झालेल्या विद्यार्थ्यांसाठी चार दिवसांचा विशेष स्टडी कॅम्प आयोजित करण्यात येत आहे. या कॅम्पमध्ये IIT गांधीनगर (गुजरात), ISRO रिसर्च लॅबोरेटरी अहमदाबाद आणि गुजरात गव्हर्नमेंट सायन्स सिटी अहमदाबाद येथे भेटी देऊन प्रगत वैज्ञानिक संशोधन आणि अंतराळ तंत्रज्ञानाचे प्रत्यक्ष ज्ञान मिळवण्याची संधी उपलब्ध होणार आहे. आर्यन चव्हाण याची या कॅम्पसाठी निवड झाली आहे. याशिवाय, इयत्ता पाचवीचा विद्यार्थी आदेश सुभाष पोखरकर आणि इयत्ता सहावीची विद्यार्थिनी स्वरा रंगनाथ भुजबळ या दोघांची जिल्हास्तरीय निवड झाली आहे. जिल्हास्तरीय निवड झालेल्या विद्यार्थ्यांसाठी ISER आयुक्त यांच्या माध्यमातून एक दिवसीय स्टडी कॅम्प आयोजित केला जाणार आहे. या यशस्वी विद्यार्थ्यांना मार्गदर्शन करण्याचे श्रेय मुख्यतः प्राध्यापक प्रियांका येवले, प्रियांका भोसले आणि सुप्रिया वारे यांना जाते. त्यांच्या अथक प्रयत्नांमुळे हे यश मिळाले आहे. या यशस्वी विद्यार्थ्यांचे अभिनंदन करण्यासाठी ग्रामविकास शिक्षण संस्थेचे अध्यक्ष खुशाल बोंबे, प्राचार्य रामदास मगर आणि परिसरातील ग्रामस्थांनी विशेष कार्यक्रम आयोजित केला. परिसरातून या विद्यार्थ्यांना मनापासून शुभेच्छा आणि अभिनंदन व्यक्त केले जात आहे. हे यश केवळ विद्यार्थ्यांचेच नव्हे, तर श्रीदत्त विद्यालय आणि संपूर्ण पिंपरखेड परिसरासाठी अभिमानास्पद आहे. अशा प्रकारच्या स्पर्धांमधून उमटणारी ही प्रतिभा भविष्यात देशाच्या वैज्ञानिक प्रगतीत महत्त्वपूर्ण योगदान देईल, अशी अपेक्षा व्यक्त केली जात आहे.
